Vanoshaya vobatsirwa
HURUMENDE yeGerman, kuburikidza neGerman Federal Foreign Office, yakapa rutsigiro rwe€3 miriyoni kusangano reWorld Food Programme (WFP) muZimbabwe kuti vayamure mhuri dzinonetseka kuwana zvekudya munguva iyo nyika iri kutambudzwa nechirwere cheCovid-19.
Mari iyi ndechimwe chikamu che€18 miriyoni yakapihwa kunyika yeGermany kuti ibatsire nyika dziri muSouthern Africa mugore ra2021-2023.
Rubatsiro urwu rwuchashandiswa mukutenga chikafu nekutsigira madzimai, varume, vanasikana nevakomana kusanganisira vanobva kune dzimwe nyika vachitiza hondo kana mamwe matambudziko (refugees) kuti vawaniswe kudya kunovaka muviri apo vanhu vave kugadzirira mwaka wekurima unotevera.
Mutevedzeri wemumiririri wenyika yeGerman muno, Christian Oelfke anoti rutsigiro urwu rwuchaenda kuvanhu vanotambura zvakanyanya.
“Senzira yekuderedza matambudziko ayo ari kuunzwa nekuda kwechirwere cheCovid-19, takapa rubatsiro kune veruzhinji muZimbabwe. Kunyuka kweCovid-19 kwakanganisa kuwanikwa kwechikafu kumhuri dzakawanda, nekudaro rubatsiro urwu rwuchaita kuti mhuri dzinotambura dzibatsirikane,” vanodaro.
Muzvare Francesca Edelman, anova country director pamwe nemuririri weWorld Food Programme muno, vanoti rubatsiro urwu rwauya panguva iyo rwanga rwuchidiwa zvakanyanya sezvo vakawanda vari kukundikana kuisa chikafu chinovakwanira patafura nekuda kwechirwere cheCovid-19.
“Chirwere cheCovid-19 chiri kukanganisa vanhu munyika zvichitevera kumbomiswa kufamba-famba kwevanhu nedonzvo rekuedza kuderedza kutekeshera kwacho. Saka vanhu vakawanda varasikirwa nemabasa ayo aivapa chouviri.
“Vanhu vazhinji muZimbabwe vanopona nemabasa ekuzviitira nekudaro kumbomiswa kushanda kwaita vanhu ava kwakakanganisa raramo yavo. Tinofara zvikuru kuti kuchikamu chekurima kwakaratidza kuva nepundutso apo vanhu vakawana goho guru, asi kune dzimwe nzvimbo nzara ichiriko.
“Tine vapoteri (refugees) avo vari kuTongogara Refugee Camp vanova vari kunetseka kudya vari uye vanopona nerutsigiro rwunobva kuWFP. Rubatsiro rwatawaniswa neGermany rwuchaita kuti vanotambura vabatsirikane zvikuru,” vanodaro.
Ongororo yakaitwa mugore ra2020 maringe neraramo yevanhu vemumaguta (Urban Livelihoods Assessment) inoratidza kuti vanhu 2,4 miriyoni vemumaguta kana kuti chikamu che42 percent chevanhu vari muZimbabwe havana chokudya chinovakwanira apo vagari vekumaruwa vanosvika 2,9 miriyoni kana kuti chikamu che27 percent vanenge vasina chekudya chakakwana, zvikuru pakati pemwedzi waNdira-Kurume.