Lefter Koka, kundër LSI: Nuk e djeg mandatin, na përdor Berisha
Malltezi: Lefteri po detyrohet të hedhë “vallen” e Ramës
LSI
iu bashkua unanimisht opozitës së bashkuar për të djegur mandatet, por dje deputeti i Durrësit, Lefter Koka, doli kundër vullnetit të grupit dhe kryetares Monika Kryemadhi. Ai deklaroi se është zgjedhur për të përfaqësuar popullin dhe shton se LSI po tërhiqet zvarrë nga Sali Berisha, njëri që sipas Kokës, bën thirrje për të qëlluar me "plumb ballit" në shekullin e 21. "Vendimi im i palëkundur është se unë nuk do të djeg mandatin e deputetit, që mijëra durrsakë më kanë besuar. I zgjedhur prej vullnetit të bashkëqytetarëve të mi, për të ushtruar pushtetin legjislativ dhe të jem përfaqësuesi i tyre. Parimet e mia në 2 dekada të jetës sime politike janë udhëhequr vetëm nga interesi i qytetarëve. Janë ata që më kanë treguar gjithmonë cila është e drejta dhe e vërteta, janë ata bashkudhëtarët dhe udhërrëfyesit e mi", tha z. Koka. Ky sipas tij, nuk është një vendim thjesht i Lëvizjes Socialiste për Integrim, por i Saliut, i cili në shekullin e 21 bën thirrje për plumba ballit. "Mandati im është besimi i mijëra qytetarëve. Është mandati i qytetarisë, kulturës dhe fisnikërisë durrsake, që as në ditët më të vështira të këtij qyteti nuk theu kurrë një xham. Qytetarët durrsakë kanë treguar në çdo kohë se ata janë shembulli më i mirë i shoqërisë shqiptare. Mandati im nuk mund të përdoret asesi për t'u vënë flakën institucioneve shtetërore apo parlamentit shqiptar. Thellësisht mirënjohës për të përfaqësuar sa më denjësisht zërin tuaj!", deklaroi z. Koka. Por, anëtari i kryesisë së PD- së, Jamarbër Malltezi, shprehet se Lefteri po detyrohet të hedhë "vallen e Ramës" për shkak të firmës që ka hedhur kur ishte ministër Mjedisi, në atë që e quan afera 178 milionë euro e inceneratorëve.