Armë e drogë në makinë, arrestohen katër persona

TIRANË - Katër persona kanë rënë në prangat e Policisë së Shtetit për armëmbajtje pa leje, posedim lëndësh narkotike dhe aktivitetin e paligjshëm të lojërave të fatit. Përveç të arrestuarve të paktën 4 të tjerë janë proceduar penalisht, ndërsa një pjesë e madhe e denoncimeve janë bërë nga vetë qytetarët. Në mesin e të arrestuarve është edhe një 22 vjeçar nga Puka, i cili lëvizte në makinën e tij me kallashnikov. Në Librazhd është arrestuar një 49- vjeçar, të cilit i janë sekuestruar 14 fishekë si dhe 7 kg kanabis. Në Vlorë është arrestuar 36- vjeçari me iniciale S. D., të cilit i është sekuestruar kanabis. Në Lezhë, policia prangosi 50- vjeçarin me iniciale R. G., të cilit i janë gjendur në banesë 1.5 kg lëndë narkotike.