MY SIEKTE SONDER KUUR
Wyley p prof. Chris Barnard se oudste dogter vertel van haar drie jaar lange stryd teen Parkinson se siekte
SY HET geweet daar is groot fout toe haar kinders op ’n dag sê hulle soek hul “ou mamma” terug. Die tekens was daar: haar vinger wat uit die bloute dans, die skielike tinteling in haar linkerarm. Sy was besluiteloos en angstig, het haar man gekla, en sy het anders begin loop. Toe kom die skokdiagnose: Sy het Parkinson se siekte, ’n breinafwyking wat jou geleidelik spierbeheer laat verloor. Deirdre Barnard Visser, oudste dogter van die hartpionier prof. Christiaan Barnard, ly aan ’n siekte waarvoor geen geneesmiddel bestaan nie. In sy laaste TV-onderhoud, sowat ’n maand voor sy dood in September 2001, het haar pa ironies genoeg gesê hy meen stamselnavorsing gaan vorentoe selfs Parkinson-lyers kan help. Maar daardie voorspelling in Sandra op ’n Drafstap, Sandra Prinsloo se geselsprogram op kykNET, het nog nie waar geword nie. Deirdre kon die diagnose nie aanvaar nie. “Aan die begin was dit verskriklik,” sê die 66-jarige ma van twee. Sy klem ’n rooi sakdoek vas in haar linkerhand, wat deurgaans bewe, ’ n simptoom van haar siekte. Sy het by vier neuroloë gaan aanklop en verskillende alternatiewe terapieë beproef. Sy is ook twee keer weens kwaai depressie in ’n psigiatriese kliniek opgeneem.
Nou, drie jaar later, voel sy beter. “Baie mense sê hulle sal nie eens agterkom ek het dit nie, maar dis vir my moeilik. Wanneer jy by mense is, konsentreer jy heeltyd om nie te wikkel nie. Partykeer sit ek met my hand so,” sê sy en steek haar linkerhand onder haar linkerbeen in waar sy op ’n bruin leerrusbank sit.
Sy het Lucky Man: A Memoir (2002) deur die Hollywood-akteur en Parkinson-lyer Michael J. Fox (54) gelees. “Hy het gesê wanneer hy soggens wakker word, beweeg sy vinger so. Ek het dit ook. Jy wens maar jy het nie die siekte nie.” Sy gee ’n wrang laggie. “Die ergste is om dit te aanvaar, en die gedagte dat jy nie kan beter word nie.”
DIE voorportaal van Deirdre en haar man, prof. Kobus Visser (63), se tweeverdiepingmeenthuis in Tuine, Kaapstad, getuig van die glanslewe wat haar pa eens gelei het. Daar is ’n foto van hom saam met oudpres. Nelson Mandela en op ’n ander glimlag hy breed by wyle prinses Diana.
Chris was ’n “pa-figuur” vir Diana in die tyd toe sy nog met die hartchirurg dr. Hasnat Khan uitgegaan het, sê Deirdre, deesdae ’n huisvrou. Sy was 30 jaar in die onderwys, maar het in 2012 haar pos as remediërende onderwyser by die Joodse skool Herzlia in Seepunt weens kostebesnoeiing verloor. “Dis nogal ’n ding as jy jou hele lewe lank gewerk het,” sê sy. En toe begin die tinteling in haar linkerarm.
Sy is dokter toe. Dié het gesê dit is dalk net ’n vasgeknypte senuwee en het haar na die neuroloog dr. Dion Opperman verwys. By hom moes sy vingeroefeninge