NUWE DVD’S
THE HATEFUL EIGHT
168 min. Quentin Tarantino keer terug met sy agtste rolprent – nog ’n gewelddadige, veelseggende huldeblyk aan sy gunstelingrolprente en ’n samevoeging van genres.
Die intrige speel af ’n paar jaar ná die Amerikaanse Burgeroorlog en begin met ’n poskoets wat voor ’n hewige sneeustorm in Wyoming probeer uitry. Binne is ’n kopjagter ( wat sy gevangene ( na Red Rock neem om gehang te word. Hulle laai twee mans op – ’n kopjagter en oudsoldaat (Samuel L. Jackson) en ’n Suiderling (Walton Goggins) wat beweer hy is Red Rock se nuwe sheriff – en haal ’n halfweghuis. Daar is reeds vier twyfelagtige karakters – ’n Mexikaan (Demián Bichir), ’n Engelse laksman (Tim Roth), ’n cowboy (Michael Madsen) en ’n oudgeneraal (Bruce Dern).
Die interessante aanloop en uiteenlopende groep, met oorgawe vertolk deur ’n oorwegend goeie rolverdeling wat aan Tarantino se kleurryke dialoog kou, behou maklik ’n mens se aandag amper drie uur lank. Danksy die gebruik van ’n outydse wyeskerm-filmformaat is die skote van die sneeuwildernis asemrowend. Die komponis Ennio Morricone se meesleurende musiek het sy Oscar verdien. Ongelukkig daal die rolprent tot beuselagtige oomblikke wat kragtige tonele ondermyn wanneer Tarantino probeer skok met ekstreme geweld, en die klimaks is onbevredigend. Sy aanhangers behoort dit te geniet, maar dit bied niks nuuts wat skeptici tot ander insigte sal bring nie. – SANDRA VISSER Western. * DVD’S is teen dié pryse beskikbaar by takealot.com.
2015. 85 min. O. Animasie-avontuur. Die onbeholpe, skaam, wanaangepaste agtjarige Charlie Brown (Noah Schnapp se stem) en sy uiteenlopende groep vriende is terug om ’n nuwe geslag met sy ploeterende manewales en ongelukke te vermaak – al skiet die rolprent dalk tekort in ’n era waarin baie animasierolprente blykbaar die melodrama ophoop. Getrou aan sy wortels van die 1950’s, is die rolprent meer hansworsery en amper kuis in sy storievertelling. Vir ’n ouer geslag is dit ’n vars briesie en ’n herinneringsreis, maar vandag se tieners sal dalk dink dis vervelig. – LYNN ELY
RETURN TO SENDER
’n Verpleegster (Rosamund Pike van Gone Girl-faam) korrespondeer met haar verkragter (Shiloh Fernandez) en besoek hom in die tronk. Hulle smee ’n aardige vriendskap en ná sy vrylating help hy haar met opknapping aan haar huis, maar iets meer as ’n vreemde romanse broei. Pike is uitstekend in die rol as die verontregte vrou wat vergelding soek, en Fernandez is puik as die opperste misgewas / sjarmante probleemkind. Tog word die kyker se ongemak met die stadige pas so uitgerek dat die (hoewel goeie) ontknoping meer onthutsend as bevredigend is. – MARIANA LOOTS
BEFORE WE GO
Die straatviolis Nick Vaughan (Chris Evans) kom af op ’n vrou in nood, Brooke Dalton (Alice Eve), op ’n stasie in Manhattan en besluit om haar te help. Hulle leer mekaar ken terwyl hulle deur die stad beweeg en Brooke by die huis in Boston probeer kry. Ongelukkig draal Evans se regiedebuut op plekke, is onoortuigend op ander, geneig om vervelig te raak en bederf ’n dubbelsinnige einde dit. Net vir liefhebbers van Before Sunrise (1995) en Before Sunset (2004). – CHEZ POOL Pryse was korrek met druktyd en is onderworpe aan verandering sonder vooraf kennisgewing.