MIDDAGSLAPIES MET MAMMA AS KUSSING
HDeur Y SNORK, lê meer as sy helfte van die bed vol en laat haar wakker skrik wanneer hy haar tone lek. Tog sê Laura Ellison daar is geen gesig wat sy liewer sal wil sien wanneer sy wakker word as dié van ’n jong witrenostertjie nie.
Toe sy ma kort ná sy geboorte dood is, is Kabelo gebring na The Rhino Orphanage in Limpopo, waar Laura, ’n veeartsenykundige verpleegster, hom dadelik onder haar vlerk geneem het.
“Ek het vyf nagte lank op ’n matras langs hom geslaap tot hy gewoond was aan sy omgewing en die geluide en nie bang was om alleen te wees nie,” vertel die blondekop (24) telefonies vanaf die oord vir renosterwesies.
Kabelo is nou 10 maande oud, weeg ’n yslike 400 kg en drink steeds formulemelk. Al slaap hy nou snags alleen, plaas Laura foto’s op sosiale media van hulle twee wat knus langs mekaar middagslapies geniet.
“Ek is eintlik net sy kussing,” skryf sy by een van die oulike foto’s wat internettreffers geword het nadat sy hulle op Instagram en Facebook begin deel het.
Laura, ’n gebore Australiër van Forster in Nieu-Suid-Wallis, het al talle roerende oomblikke met renosters beleef vandat sy twee jaar gelede in Limpopo begin werk het, maar Kabelo het haar hart die diepste binnegekruip.
Die renosterkalfie het haar vinnig as sy plaasvervangerma aangeneem. “Hy was baie versigtig om nie op my te trap nie,” vertel Laura van die reusebaba wat op drie maande reeds 160 kg geweeg het. “Dit was vir my ongelooflik.”
LAURA het die eerste keer haar hart op renosters verloor terwyl sy by ’n dieretuin in Australië gewerk het. Sy wou met hulle in hul natuurlike habitat werk; daarom het sy in 2014 Suid-Afrika toe gekom en by The Rhino Orphanage in die Waterbergstreek in Limpopo begin werk. Hulle maak daarop aanspraak dat hulle die wêreld se eerste skuiling sonder winsoogmerk vir babarenosters is.
Negentig persent van die wêreld se renosters word in Suid-Afrika aangetref, maar hul getalle neem skrikwekkend vinnig af met dié dat stropers nou meer as drie renosters per dag van kant maak.
Hierdie statistiek het Arrie van Deventer, ’n bewaringsbewuste, so ontstel dat hy in 2012 met die skuiling begin het. Laura deel haar oulike renosterfoto’s in die hoop dat dit mense meer bewus sal maak van hierdie bedreigde diere se lot.
“Kabelo is op die oomblik ’n ware kampvegter vir die saak,” sê sy. “Wanneer jy in ’n renoster se teenwoordigheid is, kan jy aanvoel watter besonderse diere hulle is. Elkeen het sy eie persoonlikheid