Ons is kreatiewer
Tegnologie gee jou nou ’n voordeel bo jou mededingers
Verwonder jy jou aan jou voorskoolse kind se verbeeldingryke Lego-skepping? Danksy tegnologie kan jy ander se idees naboots, daarvan leer en dit aanpas.
Richard Florida skryf in sy topverkoperboek The Rise of the Creative Class dat tegnologie talle tradisionele take – soos banksake, briewe skryf en naslaanwerk – verander het. Dit skep ruimte vir kreatiwiteit.
Tegnologie gee jou nou ’n voordeel bo jou mededingers, skryf hy.
Almal van beleggers en mediese navorsers tot ingenieurs en politici moet hul mededingers uitoorlê deur kreatiewer te dink.
Dink byvoorbeeld aan ’n bank wat ’n app ontwikkel wat banksake vergemaklik, of ’n mediese navorser wat ’n goedkoper manier ontwikkel om vir siekte te toets.
Ons is hopeloos te verknog aan ons toestelle
Al ooit gedink jy’t pas jou foon voel vibreer – maar toe is dit net jou verbeelding? Dit word beskryf as spook-vibrasiesindroom.
Tot 90 persent van mense ly daaraan, volgens professore van die Georgia-instituut van Tegnologie.
Die sensasie is in ’n studie deur Indiese sielkundiges in 2014 aan oorbetrokkenheid by jou selfoon of ander toestelle toegeskryf.
“Die uiters hoë voorkoms van spookvibrasies in ons studie getuig daarvan dat normale breinmeganismes wel hier ter sprake is,” het navorsers die toestand verduidelik.
In die navorsing is ook bevind ons slaap sleg omdat ons kort voor slaaptyd te veel na skerms kyk. Vir ’n goeie nagrus is dit raadsaam om ’n uur voor slapenstyd jou toestelle af te skakel – en dit nie in die bed te gebruik nie.