EN DIE NADELE?
“Hoewel kortisoon ’n baie kragtige antiinflammatoriese middel vir korttermynprobleme is, is daar nadele as jy dit oor ’n lang tydperk neem,” sê Aletta van der Watt van die Artritisvereniging van Suid-Afrika.
Kortisoon kan kalsuim uit die bene trek, wat osteoporose kan veroorsaak as dit nie gemonitor word nie.
Volgens Charl is een van die algemene newe-effekte pyn in die skouer en nek ná die inspuiting. Dit kan behandel word met rus en ’n pynpil.
“Jy kan ook ’n dag of twee warm gloede in jou gesig kry,” sê hy. “Dis nie ’n allergie nie; dis net ’n lastige, skadelose neweeffek.”
Helmuth sê die newe-effekte hang af van die dosis en hoe lank die kortisoon in jou stelsel bly. Hy sê van die newe-effekte kan insluit:
Swelling omdat jou liggaam vloeistof terughou.
’n Styging in jou bloeddruk en bloedsuikervlak. Gewigstoename. Vel wat dunner word. ’n Toename in vatbaarheid vir tuberkulose en swaminfeksies.
“Diabete het ’n kortstondige toename in hul bloedsuiker en moet hul bloedsuikervlak gereeld neem,” sê Charl.
Die plek waar jy jou kortisooninspuitings gekry het, kry selde infeksie, maar ’n mens kan dit soms kry weens ’n inspuiting in die gewrig, sê hy. “Dit kan voorkom word deur ’n goeie inspuitingstegniek.”