NUWE DVD’S
VIR ALTYD
2016. 100 min. O. Nina ( droom al van kleins af oor die volmaakte troue, maar toe haar bruidegom haar voor die kansel los, stort haar wêreld in duie. Die onthaal ontaard in ’n wilde partytjie, en voor sy tot haar sinne kan kom, is sy en haar vervreemde jeugvriend, Hugo ( in Mauritius vir haar “wittebrood”. Hier kruis hul pad met twee ouer pare by wie Nina leer dit is nie die troudag wat tel nie; dis die leeftyd saam.
Oom Paul en tannie Betsie, gevoelvol en prettig gespeel deur die veteraanakteurs Wilson Dunster en Elize Cawood , gee die prent humor en ’n hart. Maar Illse Roos steel die kollig met haar subtiele vertolking van ’n verwaarloosde vrou wat alles sal doen om haar huwelik te red.
Vir Altyd is die tweede fliek wat Roberts en Botha geskryf en vervaardig het. Die sukses van die eerste een, Pad na Jou Hart (2014), het kykers hoë verwagtings laat koester en gelukkig stel hierdie rolprent nie teleur nie.
Net soos sy voorganger, het Vir Altyd ’n bietjie meer diepte as jou deursnee romantiese komedie, sonder om ooit werklik die ligte trant van ’n komedie te verloor. Dit is die ideale fliek dié vir ’n romantiese kuier of ’n aandjie vir die vroue. – ANNEKE STREICHER
SPOTLIGHT
2015. 124 min. 13T. Ware lewensdrama. In 2001 stel The Boston Globe se redakteur (Liev Schreiber) voor die koerant se ondersoekspan, Spotlight, bekyk bewerings dat Katolieke priesters kinders molesteer. Pleks van die skokkende besonderhede uitbuit, skram die regisseur, Tom McCarthy, van sensasie weg en vestig die aandag op die feite, wat sorgvuldig ingesamel word. Al klink dit vervelig, verhoog dit die trefkrag. Terwyl die legkaart stuk vir stuk voltooi word, groei die gevoel van onheil en hou jou vasgenael voor die skerm. Spotlight het die Oscar gewen as beste rolprent – SANDRA VISSER
SISTERS
Toe hul ouers hul gesinshuis in die mark sit, besluit die wanfuksionele dogters Maura en Kate (die Saturday Night Live-sterre Amy Poehler en Tina Fey) om dit ’n laaste keer te besoek. Ewe onverantwoordelik nooi hulle ou skoolvriende na ’n reuse-afskeidspartytjie wat die huis verwoes. Maura, ’n verpleegster wat onlangs geskei is, kry selfs tussen alles deur ’n nuwe kêrel (Ike Barinholtz). Sisters se ou bekende storie maak elke grap voorspelbaar, maar die egte vonk tussen die hoofakteurs, beste vriende in die regte lewe, red die komedie van volslae middelmatigheid. Genotvol, maar nou nie juis onvergeetlik nie. – PETRUS MALHERBE
RIDE ALONG 2
Wanneer jy besluit om Ride Along 2 te kyk, moet jy weet waarvoor jy jou inlaat: kougom-tussen-die-oë-humor met die krag van ’n uitgeputte trapper aan die stuur van ’n fietstaxi. In die fliek word die storie van die eerste (ewe flou) gelyknamige polisiekomedie ná ’n kort onderbreking hervat. Met sy troudag wat om die draai is, gaan Ben (Kevin Hart) saam met sy toekomstige swaer, James (Ice Cube), na Miami om ’n dwelmhandelaar (Benjamin Bratt) te laat les opsê. Kevin en Ice Cube moet hulle eerder op van hul ander werk roem. – ANNAMI MAILOVICH Pryse was korrek met druktyd en is onderworpe aan verandering sonder kennisgewing.