Die groen Mustang
trent die hele wêreld se litiumproduksie absorbeer om ’n halfmiljoen karre jaarliks te vervaardig. Die fabriek sal meer litium-ioonbatterye vervaardig as alle ander fabrieke saam.”
Gigafactory 1 wek ook sy eie krag op, veral met behulp van sonpanele.
Die fabriek word in afdelings voltooi en produksie ingefaseer. Die Powerwallhuisbattery en die Powerpack vir kommersiële gebruikers word reeds hier vervaardig. Elon het dié stelsels, wat gelaai kan word deur ’n nasionale kragnetwerk of alternatiewe tegnologie soos sonkrag, in 2015 in Amerika bekendgestel.
Daar was eers heelwat belangstelling uit Suid-Afrika, maar weens die swak rand is die installering van die Powerwalls veels te duur vir die meeste mense.
Vir eers val die kollig op die Gigafactory 1 en of dit groen wiele bekostigbaar kan maak vir gewone mense. Battery- produksie vir die Model 3 behoort in 2017 te begin. Dié batterye sal per spoor na die Tesla-fabriek in Kalifornië vervoer word, waar kommersiële produksie van die Model 3 einde 2017 behoort te begin. Die opgewondenheid oor Elon se planne vir die Model 3 word met die bohaai oor die koms van die Ford Mustang in die 1960’s vergelyk. ’n Volkome elektriese model, maar met die spierkrag van die klassieke (brandstofslurpende) Mustang. En boonop bekostigbaar!
Tesla wil die wêreld se oorgang na volhoubare energie verhaas deur elektriese voertuie te bou wat beter as brandstofmotors is, “met puik wringkrag, ongelooflike versnelling en geen uitlaatgasse nie”.
Elon het 10 jaar gelede sy Tesla Motorsmeesterplan in ’n blog as volg opgesom: Bou ’n sportmotor, die Tesla Roadster; Gebruik die geld hieruit om ’n bekostigbaarder motor te ontwikkel, die Model S.
Gebruik weer dié geld om ’n selfs bekostigbaarder ryding te bou, die Model 3.
Die Roadster versnel binne 3,7 sek. van 0 tot 100 km/h en kan verder as 400 km ry voor dit herlaai moet word; die Model S is ’n gesinsmotor met plek vir sewe passasiers, maar het die versnelling van ’n sportmotor en ’n reikafstand van 440 km.
Toe kom Elon se monsterweergawe van die Model S: die vierwielaangedrewe dubbelenjin-P85D. Teen 0-100 km/h binne 3,2 sek. was dit die vierdeurproduksiesedan met die vinnigste versnelling tot in daardie stadium. En in 2015 was daar die Model X, die nutsvoertuig met die allervinnigste versnelling, ook 3,2 sek.
Maar met ’n dollarprys van $75 000 tot $100 000 (R1,1 miljoen tot R1,47 miljoen) vir byvoorbeeld die S en X, is Teslamotors nog veels te duur vir Jan Alleman. Dis waar die Model 3 inkom. “Jy sal nie ’n beter motor vir $35 000 kry nie, selfs sonder enige ekstras,”ekstras, het Elon by die onthulling gesê.
Tog, weens ons power wisselkoers kos dit hier sowat R514 000, steeds te duur. Maar dalk eendag, mits Tesla sy produksie genoeg uitbrei, die mededinging tussen vervaardigers pryse afjaag en die rand herstel.
Intussen kan ’n mens jou verlustig in wat die Model 3 alles bied. Selfs die standaardmotor haal 0-100 km/h binne net meer as 5 sek. Die reikafstand is meer as 350 km, twee keer so ver as die mededingers wat in Suid-Afrika beskikbaar is.
Tesla se Autopilot-stelsel is boonop standaard. Deur ultrasoniese sensors kan die motor grootliks self stuur. Dit kan in dieselfde baan bly, van baan verwissel, hindernisse vermy en self parkeer.
Dit bied meer as genoeg ruimte vir vyf volwassenes en sal ’n kattebak voor en agter hê. “Dit het meer bagasieruimte as enige brandstofmotor van dieselfde afmetings,” volgens Elon.
Die Model 3 kan ’n einde maak aan elektriese motors wat onaantreklik, lui, beknop en – weens ’n kort reikafstand – onbetroubaar is.
Elon-hulle se Supercharger-netwerk van gratis snelherlaaipunte oral in Noord-Amerika en op sommige hoofroetes in Europa en Pasifiese Asië vergemaklik reeds lang reise. Einde 2017 kan hulle 7 200 Superchargers wêreldwyd hê, dubbel soveel as vandag.
Meer as 400 000 mense het reeds binne weke ná die bekendstelling hul plek op die Model 3-waglys met ’n deposito van R14 500 bespreek. BRONNE: TESLAMOTORS.COM, TELEGRAPH.CO.UK, BLOOMBERG. COM, THEVERGE.COM, FORTUNE.COM, IRISHTIMES.COM, RGJ. COM, AP Elon het by ’n Tesla-geselligheid bevestig sy visie vir die 21ste-eeuse elektriese motor strek veel wyer as die vervaardigingsbasis in Nevada. Nog gigafabrieke sal mettertyd elders gebou word – en nie noodwendig net deur Tesla nie. Elon glo daarin om sy tegnologie toeganklik te maak, wat beteken enigeen sal in die toekoms sy eie batteryaanleg kan bou, gegrond op die Gigafactory-bloudruk.