DOEN JOU HUISWERK
IN DIE ou dae het mense sommer gepraat van “tweedehandse” motors. Toe word dit “voorheen besit”. En nou hoor jy selfs mense noem dit “pre-loved”. Maar een ding is seker: Met die taai tye waardeur ons ekonomie sukkel, kies baie Suid-Afrikaners deesdae om ’n ryding aan te skaf wat al ’n paar keer om die blok is, eerder as iets nuuts uit die boks. Soos die verkope van nuwe motors afneem, styg die verkope van gebruikte motors, sê Layton Beard, woordvoerder van die Automobiel- Assosiasie van Suid-Afrika (AA).
Tans word byna drie keer soveel gebruikte motors as nuwe motors in Suid-Afrika verkoop, sê Jeff Osborne, hoof van Gumtree Automotive, ’n eBayfiliaal wat onder meer gebruikte motors aanlyn verkoop. ’n Nuwe motor se waarde verminder met tot 30 persent binne die eerste twee maande nadat jy dit gekoop het; daarom kan jy net sowel ’n goeie gebruikte motor met min kilometers oorweeg.
Maar al is tweedehandse voertuie dikwels ’n goeie opsie, moet kopers bewus wees van die slaggate, soos moontlike meganiese probleme of hoë instandhoudingskoste. Hoe maak jy seker jy slaan wel ’n eersterangse slag in die tweedehandse mark?
Besoek motorwebtuistes, fynkam kleinadvertensies, bestudeer motorkoopgidse en besoek handelaars om pryse te vergelyk, is die AA se raad.
Begroot: Kyk hoeveel jy aan maandelikse paaiemente kan terugbetaal. Hou ook moontlike verdere rentekoers- en brandstofprysstygings in gedagte. As jy net-net ’n nuwe motor kan bekostig, sal dit dalk veiliger wees as jy iets oorweeg wat voorheen besit is, sê Layton. Maak seker die motor is wat die ver
koper sê: Jou beste kopie is ’n demonstrasiemodel by fabrikaatfranchises, sê Jeff. Hul kilometerlesing is gewoonlik baie laag, die fabriekswaarborg geld dikwels nog vir geruime tyd en soms kry jy ’n versieningsplan daarby. “Maar daar’s min sulke motors.”
As jy by so ’n handelaar koop, “het jy groter gemoedsrus dat jy deur die Verbruikersbeskermingswet gedek word”. Jy hoef ook nie so erg bang te wees dat die motor verskuilde probleme het of selfs gesteel is nie.
Dit beteken nie jy moet privaat verkopers noodwendig heeltemal vermy nie; soms kan jy so beter waarde vir jou geld as by ’n handelaar kry. Maar oorweeg die hulp van ’n diensverskaffer wat ook seker maak alles is in die haak met voertuie wat privaat verkoop word. In dié opsig kan toetssentrums soos Dekra s’n so ’n motor tegnies nagaan en ’n kredietburo soos TransUnion kan kyk of daar uitstaande skuld op die motor is, dit gesteel is, en dikwels ook of dit al in ’n groot ongeluk was.
Mense dink dis moeilik vir skelm verkopers om met hedendaagse motors se afstandmeter te peuter. “Die waarheid is dat dit dalk selfs makliker is,” sê Jeff. Dit verg trouens minder werskaf om ’n moderne digitale afstandmeter “terug te rol” as ’n meganiese meter; skelms prop basies net ’n skootrekenaar by die elektroniese enjinbeheerstelsel se diagnostiese ( foutvind-) kanaal in en tik ’n nuwe kilometerlesing in.
As jy dus ’n motor teëkom wat 10 jaar oud is, maar net 20 000 km op die afstandmeter toon, is dit ’n teken dat jy sy geskiedenis deegliker moet nagaan.
Soms het die eienaar bloot min daarmee gery. Maar dis ook nie altyd ’n goeie ding nie, want motors wil gery word, onder meer sodat smeermiddels hul werk kan doen. Hidrouliese stelsels en mega-