TE GROOT VIR DOEKE

My dogter is besig om te skei. Haar man het haar vyfjarige kind gevat. Die seun is bang vir ’n toilet, maar al te groot vir doeke. My dogter se skoonma bel haar elke dag om geld te vra vir doeke. Wat moet sy doen?

BM op RADS

Tydens ’n hangende egskeiding kan ’n hofbevel verkry word om tussentydse reëlings te tref vir die versorging van kinders. Jou skoonseun mag gevolglik nie sommer net die kind gevat het nie.

Julle moet dringend by die Kinderhof ’n saak aanhangig maak. Hierdie arme seuntjie se inkontinensieprobleem en toiletvrees word moontlik deur die skeiding van sy ma vererger, en ook deur struwelinge en spanning oor sy versorging.

As jou dogter nie ’n regsverteenwoordiger het nie, kan sy steeds regshulp kry. Sy moet dit onder haar regsverteenwoordiger se aandag bring dat haar kind emosionele en gesondheidsprobleme kan ondervind omdat hy van haar weggeneem is. Nadat welsynwerkers daaroor verslag gelewer het, sal die hof beslis wat in sy beste belang is.

In hierdie omstandighede sal dit net nog meer spanning by jou kleinseun veroorsaak as hy moet ophou doek dra. Sy vrees vir die toilet kan met berading en sy moontlike inkontinensie met die leiding van ’n klinieksuster opgelos word, maar dit gaan liefdevolle toewyding en ’n vaste roetine verg.

Hy sal binnekort preprimêre skool toe moet gaan en sal dan nie meer kan doeke dra nie.

Maak asseblief so gou moontlik werk hiervan om hom enige hartseer en vernedering te spaar en om te keer dat hy eers later sal kan begin skoolgaan.