DRAMA WEG VAN DIE STADIONS
Die wêreld se bekende sportlui se privaat lewe is pal in die kollig – en dit geld vir talle deelnemers in Rio.
Die Suid-Afrikaanse spiesgooister Sunette Viljoen (32) het onlangs op haar Facebook-blad uitgevaar teen haar familie, wat glo nou nog nie haar verhouding met die eNuus-leser LiMari Louw goed- keur nie. “Dit is vir my die moeilikste, ontstellendste ding om te doen,” skryf Sunette op Facebook. “Maar ek moet praat, ter wille van ander wat deur dieselfde hel gaan. Ek praat ter wille van elke mens . . . wat emosioneel of fisiek gebreek word oor wie hulle liefhet. Ek sal my hande stompies vir julle baklei en ek dra my Olimpiese jaar aan julle op.”
Die Britse duiker Tom Daley (22) het sy hart oopgemaak oor hoe hy op ’n onlangse verjaardag sy ma, Debbie, vertel het hy het al drie jaar lank ’n verhouding met ’n man. Hy het sy kêrel, die Amerikaanse draaiboekskrywer Lance Black (42), na die partytjie gebring. “My ma het geen benul gehad nie. Dit was net ’n gewone gesprek in die kombuis. Ek het my ma gevra wat sy van Lance dink. Sy het gesê hy is wonderlik. Toe sê ek vir haar ek het ’n verhouding met hom,” het Tom aan pinknews.co.uk vertel.
“Sy wou weet: ‘Bedoel jy ’n gay verhouding?’ Ek het ja gesê. En sy sê toe: ‘Nou goed dan.’ Dit was makliker as wat ek gedink het dit sou wees.”
Twee Britse atlete wat as mans gebore is, sal as vroue in Rio deelneem. Dié twee, wie se name nie bekendgemaak is nie, sal Olimpiese geskiedenis maak as die eerste transgender atlete. Delia Johnston, ’n konsultant oor transgender sake vir sportliggame, het vertel een van die twee is ’n sterk aanspraakmaker op ’n medalje in haar sportsoort.