SIEKTES EN SOENE

Alle kontak hou risiko’s in, soene ook, sê dr. Jack Meintjes, hoof van die Universiteit Stellenbosch se sentrum vir infeksiebeheer en -voorkoming. “Jou immuunstelsel speel ook ’n rol.” Volgens hom is in studies bewys dis goed om soms van mense se organismes in te kry. ’n Groot bekommernis is die siekte Epstein-Barr-virus, wat deur speeksel oorgedra word. Simptome is onder meer ’n hoë koors, geswelde limfkliere en ’n seer keel. Dit genees meestal binne ’n maand of wat vanself.

Dr. Samantha Potgieter, Bloemfonteinse infeksiesiektespesialis, sê dié virus is baie algemeen en een van die bekendstes wat deur speeksel oorgedra word. Volgens haar is soen ’n algemene manier van oordrag, maar kan dit ook gebeur deur eetgerei te deel.