TOE SING EK VIR MY PAPPIE
Manie was ure ná sy pa se dood op die verhoog nadat hy kort tevore ook sy broer en beste vriend verloor het
SY LIEDJIE Vir Pa het hy in 2011 laas op die verhoog gesing, maar nooit met soveel gevoel soos vanaand nie: Jy moes gaan toe ons jou nog wou hou / Pa ons laat jou los, want ons weet waar is jy nou . . .
Agter die mikrofoon is Manie Jackson – en sy hartseer vertolking is ’n huldeblyk aan sy pa, Robbie, wat net enkele ure tevore in ’n Pretoriase hospitaal oorlede is. Pa, dankie vir alles / Pa, jy het ons met stil
le liefde omvou, het die woorde in die kuierplek in Vanderbijlpark bly hang.
Later vertel ’n emosionele Manie ons hoe hy sy pa (68) besoek het skaars twee dae voor hy op Saterdagaand 14 Januarie oorlede is. “Toe ek hom die Donderdagaand in die hospitaal groet, het ek regtig gedink ek sal hom weer sien.” En vir dié minnesanger was dit boonop die tweede reuseverlies binne sowat ses maande: Sy geliefde broer Jaco (45) is op 25 Julie oorlede weens ’n vergrote en erg verswakte hart.
MY PA se dood was baie moeilik vir ons familie, veral so gou ná Jaco se dood,” sê Manie. Robbie was voor sy dood baie siek en verswak weens nierversaking en Manie vertel “sy organe het net ingegee”. Eindelik is hy weens beroerte dood. Maar sy pa het ook “verskriklik getreur” oor Jaco (45). “Pa was verskriklik lief vir al vyf ons seuns en trots op ons almal, maar hy en Jaco het ’n spesiale band gehad.”
Nog ’n skok het gevolg toe Manie se beste vriend, Jan “Swembad” Botha (48)
van Sasolburg, ook in 2016 dood is. Lewerversaking het Jan se lewe geëis net sowat ’n maand ná Jaco se afsterwe.
Die persoonlike verliese vir Manie (37) kom te midde van sy eie stryd teen depressie en angstigheid, waarvoor hy hom al in ’n hospitaal in Vanderbijlpark laat opneem en behandel het (Kry soos ek hulp vir angs en depressie, 4 Junie 2015).
Die laaste ruk het dit beter met hom gegaan, hoewel hy steeds antidepressante gebruik.
“My vriende, aanhangers en familie se liefde en ondersteuning dra my deur hierdie moeilike tye . . . En veral my ma, Ina (68), en my wonderlike meisie, Bernice (26).”
Sy laaste gesprek met sy pa draai deur sy kop: “Pappie, ek gaan ry . . . ek het optredes,” het hy gegroet. “Nee, ek vertrou nie hierdie ryery van julle nie, dan sien ’n mens julle nooit weer nie,” het Robbie geantwoord.