FAMILIE SKINDER OOR OU LIEFDE
Ek het ’n paar jaar met ’n geduldige man uitgegaan. Die seks en baie ander dinge was goed. Ons het so vyf jaar gelede uitgemaak omdat ek baie sielkundige probleme gehad het. Nou is my ma en sy pa ’n paartjie. Ek moet hom by allerhande geleenthede sien, soos nou weer in die Kerstyd, maar ek kan my dan nie sover kry om te gaan nie. Nie ek of hy het al iemand anders in ons lewe nie. Ek wil weer deel wees van ons kuiers by die familie, maar wil hom vermy. Almal praat nog heeltyd met my en met hom oor ons verhouding. Wat kan ek doen? Elke familie het sy kwota klets- en skinderbekke. Met byna enige skeiding kies almal kant; jou familie gewoonlik joune en sy familie syne. Joune sê dalk jy is beter daaraan toe sonder hom; syne glo weer hy sal net kan aangaan met sy lewe as hy van jou kan vergeet. Jy gaan nie maklik hul mond kan snoer nie.
Jy hoef nie jou familie prys te gee net omdat jou verhouding met dié man skipbreuk gely het of jy op familiebyeenkoms te ongemaklik voel nie.
In ’n familie waar daar respek vir almal se gevoelens is, kan dit met goeie beplanning en organisasie vir julle albei moontlik gemaak word om kontak met die familie te behou en steeds mekaar se privaatheid te respekteer. Jy kan byvoorbeeld een saamtrek bywoon en hy ’n volgende. Dis ’n oorkombare uitdaging.
Wat nog belangriker is, is dat jy jou voorneem om self die situasie te verander deur iets nuuts aan te pak. Die feit dat jy nie kans sien om saam met hom in ’n vertrek te wees nie, dui op onafgehandelde sake tussen julle. ’n Gesprek hieroor sal nou, ná vyf jaar, onproduktief wees. Ou verwyte uit spyt gebore, kan net dieper letsels veroorsaak en ’n nuwe kringloop begin.
Ek raai jou wel aan om ’n nuwe lewe te begin bou deur vriendskappe aan te knoop wat jou kring van geliefdes groter maak en jou die verlede kan help agterlaat. Dalk het jy mettertyd selfs iemand nuuts wat jou na familiekuiers kan vergesel.