SORG VIR JOU DIERE
Al gedink wat van jou hondekind gaan word as jy onverwags sou sterf? Tref nou voorsorg
JOU TESTAMENT
Troeteldiere is nie bates nie en kan dus nie wetlik in jou testament aan iemand nagelaat word nie. Jy kan wel in jou testament geld nalaat aan iemand wat jy vertrou om jou diere te versorg. So ’n bepaling sal wetlik bindend wees, bevestig Ronel Williams van die Fidusiêre Instituut van Suider-Afrika. Iemand wat dit teenstaan, byvoorbeeld gierige familie, sal moet bewys dat jy as testateur nie bevoeg was om ’n testament op te stel nie of dat jy onredelik beïnvloed is met die opstel daarvan.
VOORWAARDES
Dit kan onprakties wees om geld na te laat aan iemand om na die diere om te sien. As jy wil verseker die geld word inderdaad vir jou troeteldiere se versorging gebruik, moet jy ’n voorwaarde daaraan koppel. Word daar nie aan die voorwaarde voldoen nie, verval die erflating. Dus moet iemand verseker dat dit nagekom word. Jy moet ook in jou testament voorsorg tref vir wat moet gebeur as dit verontagsaam word. Kenners meen ’n trust is ’n goeie keuse.
TRUSTS
Jy kan ’n trust opstel terwyl jy leef of ’n testamentêre trust, wat ná jou dood in tree. Ronel sê ’n testamentêre trust is gewoonlik eenvoudig en kostedoeltreffend. Die testament sal aandui watter bates of deel van jou boedel aan die trust oorgedra word, wie die trustees of inkomstebegunstigde is, hoe die trustees die geld moet gebruik, wanneer die trust beëindig word en wat met die orige bates gebeur. Die inkomstebegunstigde kan jou diere versorg; so nie wend die trustees die geld aan vir hul versorging.
SO WERK DIT
Die trustees moet die trust administreer, trustgeld belê en die geld aan die inkomstebegunstigde betaal. Die trustee of trustees kan ’n trustmaatskappy, ’n mens of mense wees. Die trust kan byvoorbeeld die inkomstebegunstigde uit die inkomste van die trustfonds betaal om na jou troeteldiere te kyk. Wanneer die laaste dier afsterf, sal die trust beëindig en die res van die kapitaalbates aan ’n mens of welsynsorganisasie van jou keuse uitbetaal word.
‘Ken jouself. Moenie jou hond se liefde aanvaar as klinkklare bewys dat jy wonderlik is nie’ – DIE AMERIKAANSE JOERNALIS RUTH CROWLEY