LIZZ MEIRING
Vir die eerste keer in haar loopbaan speel dié gesoute aktrise in ’n rillerkomedie, Hoener met die Rooi Skoene. Dit het pas in teaters begin draai
Vertel ons van jou karakter in die fliek.
Ek speel Bonnie van der Byl, die ontvangsdame by ’n teateragentskap. Sy is praatsiek en sê net wat sy dink. Bonnie is mal oor enige speur- of moordverhaal en is taamlik grootbek daaroor tot haar baas, Du Toit de Waal (gespeel deur Deon Lotz), een aand vermoor word.
Is daar enige ooreenkomste tussen jou en Bonnie?
Ek is nuuskierig, nes sy. My wêreld is darem heelwat groter as hare, want ek het die voorreg om in ’n beroep te werk wat ’n mens oral heen neem. Ek kan nou nie sê ek het soos Bonnie ’n obsessie met moordstories of rillers nie. Ek kyk nie eintlik rillers nie, want ek is ’n sissie en raak gou bang en te betrokke by die fliek. Maar hierdie fliek was anders, want ek speel daarin en weet wat in die teks gaan gebeur. As meer moordrillers met soveel vermaakwaarde soos Hoener met die Rooi Skoene geskryf word, sal ek meer gereeld daarna kyk.
Het jy ooit gedink jy sal in ’n rillerkomedie speel?
Nee. Ek is vanjaar 33 jaar in die bedryf en het al in byna 2 000 produksies gespeel (insluitend die TV-reekse Manakwalanners en Molly & Wors en die flieks Lipstiek Dipstiek en Vaatjie Sien Sy Gat). Tog het ek nooit gedink ek sal in ’n rillerkomedie speel nie. Elke nuwe genre is ’n nuwe ontdekking; dis ’n nuwe avontuur. Ek is baie dankbaar daaroor.
Wat was jou gunstelingrol van almal en waarom?
Dis moeilik, want elke rol het sy eie uitdagings, vrese en oorwinnings. En elke rol kom in ’n ander stadium van jou lewe. Maar ek het dit ontsaglik geniet om Bonnie te speel. Dis so ’n wonderlike rol en ek skrik ook nie vir baie dialoog nie. Tagtig persent van die fliek was my karakter se woorde, en ek hou van praat!
Wie was die snaaksste karakter op die stel?
Ons het ’n papegaai, Coco, op die stel gehad. Hy “vertolk die rol” van Na- poleon, Bonnie se vertroueling. Coco was vreeslik interessant om dop te hou. Hy was soms ook bra geniepsig. Die een oomblik was hy vriendelik en het hy jou toegelaat om sy kop te krap en hom ’n bietjie te streel; die volgende oomblik sou hy sommer na jou hap.
Hoe was dit om op die Wes-Kaapse dorpie Klaarstroom aan die fliek te werk?
Ek was nog nooit tevore op Klaarstroom nie; dis ’n juweeldorpie tussen die Swartberge. Die donkies loop in die straat. Dis absoluut idillies. Koos Roets (die regisseur en skrywer) woon daar en ek kan verstaan hoekom hy daarvan hou om daar te verfilm. Dit was heerlik.
Jy is uiters besig. Waarmee hou jy jou besig wanneer jy ’n ruskansie het?
Ek is mal oor geskiedenis, argeologie, mitologie en die antieke geskiedenis. Ek besoek graag museums en ander historiese besienswaardighede. Ek sal ook graag rustig saam met my pelle kuier. Ek het ’n pragtige kat, Moccha, wat altyd by my kom aandag soek; hy dwing my ook om tyd saam met hom deur te bring.