NUUT IN DIE FLIEKS / LOVING
Ware lewensdrama. Met Joel Edgerton en Ruth Negga. Regisseur: Jeff Nichols. 7-9O. Begin op 3 Februarie.
Waaroor gaan dit?
Dis die ware verhaal van Richard en Mildred Loving, wat in 1958 in die Suide van Amerika in die tronk gestop is omdat ’n huwelik tussen ’n wit man en swart vrou verbode was. Hierdie rolprent loop die lang en moeisame pad na aanvaarding saam met hulle.
Wie sal hiervan hou?
Die waarheid is vreemder as fiksie. As jy hieraan glo, sal hierdie fliek jou nie net onthuts nie; dit sal jou opnuut onder die indruk bring van die gruwels van rassisme.
Gewoonlik word die ironie en emosie in dié soort prente met dik kleurpenne onderstreep om kykers onder die indruk te bring van die onreg wat gepleeg word. Maar hier word die gruwels sodanig onderspeel dat dit juis in sy stil, strak aanslag is dat hierdie rolprent se gesaghebbendheid lê.
Behalwe die nugter en saaklike draaiboek, lê sy trefkrag ook in sy stewige karakterisering wat deur puik akteurs oorgedra word. Ruth Negga is al dikwels uitgesonder vir haar waardige en aandoenlike vertolking as Mildred, wat – ten spyte van oorweldigende aanslae teen haar en haar man – altyd waardig gebly het, terwyl Joel Edgerton feitlik onherkenbaar is as haar man. Weg is sy glansbeeld van ander rolprente. Hy slaag volkome daarin om diep onder die vel van die verwonde en oorblufte Richard Loving te kom. Maak gereed vir ’n sober, intieme en eenvoudige styl wat jou katswink sal slaan.
Dié fliek is tydsaam en ontgin sy storie deeglik, met noukeurige aandag aan die herskepping van die laat 1950’s. Vrees, vooroordeel en paranoia is lank laas so uitstekend uitgebeeld. Jy sal hierdie ongelooflike, ware verhaal lank onthou.
Kyk nou of wag vir DVD?
Mississippi Burning, Fences. Die rolprent is gegrond op die televisiedokumentêr van 2011 deur Nancy Buirski, The Loving Story.
Die sage het van 1958 tot 1967 geduur voor die hof beslis het die Lovings se huwelik is wel wettig.
Die fliek op verlede jaar se Cannes-rolprentfees 12 minute lank staande toegejuig.