DIE RIDDER EN SY MOOI NOOI
Die steeds verliefde Players kyk dankbaar terug op die pad tot by hul 60ste huweliksherdenking verlede maand
HY WAS ’n laaitie van net 14 jaar oud toe hy haar die eerste keer sien – by ’n pel se huis in die suide van Johannesburg. Dié het hom kort tevore vertel van die “mooi nooi” in die bure se agterplaas. Hy het op ’n rots geklouter om oor die hoë muur te loer – en daar sien hy haar: ’n pragtige donkerkop van 13 jaar oud.
“Ek gaan met haar trou,” het die jong Gary Player dadelik laat hoor.
“My vriend het natuurlik gedink ek is mal,” vertel dié gryse ikoon van wêreldgholf en lag, “maar dit was die begin van ons twee se sprokiesliefdesverhaal. Ses jaar later, op 19 Januarie 1957, toe trou ek wraggies met daardie mooi nooi.”
En nou, 60 jaar later, is hy en Vivienne – destyds Verwey – steeds gelukkig getroud.
Op 81 is dit vir Gary ’n groter mylpaal as al sy prestasies op die gholfbaan. En om dit te vier, het hy en die pragtige Vivienne hul huweliksbeloftes onlangs op Plettenbergbaai voor hul ses kinders en 22 kleinkinders herhaal.
“Ek is vandag liewer vir Vivienne as ooit,” vertel Gary. “Sy was nog altyd ’n ongelooflike eggenote vir my en ’n uitstekende ma vir ons kinders.”
Dit was sy idee om hul huweliksbeloftes op Nuwejaarsdag te herhaal. “Ek weet van geen ander sportman wat sy huweliksbeloftes ná 60 jaar met dieselfde vrou herhaal het nie. Wat ’n voorreg.”
DIE Players, wat met perde boer op hul plaas buite Coles berg in die NoordKaap, is vandag op ’n blitsbesoek in Kaapstad. Dis moeilik om te glo die stylvolle vrou wat ons by die deur van hul hotelsuite verwelkom, is ’n ouma wat binnekort haar 81ste verjaardag vier.
Op die TV in die sitkamer word ’n tenniswedstryd uitgesaai. “Ek is mal oor sport,” vertel Vivienne en wys na die sporthorlosie aan haar pols. “Ek en Gary is ons lewe lank al baie gesondheidsbewus. Ek het nou hierdie horlosie gekry om my daaglikse treë te tel.”
Gary sluit by ons aan en groet hartlik. Hy is van kop tot tone in swart geklee, nes die wêreld die sogenaamde Black Knight op die gholfbaan leer ken het. Toe hy daardie dag oor die muur na Vivienne loer, het Gary pas sy eerste gholfstok by sy pa gekry.
Drie jaar later, in 1953, het hy op 17 jaar ’n beroepspeler geword en die titels begin inryg. Vandag word hy steeds as een van die beste spelers nog beskou.
“Ons was drie groot gholfspelers destyds: ek, Arnold Palmer en Jack Nicklaus,” onthou hy. “En ons het al drie ’n fenomenale vrou gehad wat bankvas agter ons gestaan het. Ons sou nooit ons sukses sonder hulle kon behaal nie.”
Arnold se eerste vrou, Winifred Walzer, met wie hy in 1954 getroud is, is in 1999 oorlede. Hy het in 2005 met Kathleen Gawthrop getrou, en hulle was saam tot met sy dood verlede jaar .
Jack en sy vrou, Barbara Bash, is in