’N PRINSIE EN WARE KLEIN STRALERJAKKER
Gloria Arendz se eerste kleinkind is nog net ’n paar maande oud, maar hy reis reeds die wêreld vol
HY IS net twee maande oud, maar reeds ’n stralerjakker. Sy eerste wit Kersfees het hy in sy ouma aan moederskant se luukse chalet op Klosters in Switserland deurgebring. Nuwejaar het hy by sy pa se familie op Gstaad in dieselfde land ingelui. Nou geniet hy sy eerste somer in ’n drieverdiepinghuis in die spogbuurt Kampsbaai.
Vandag maak Rob Felipe Agostinelli sy debuut in Huisgenoot. Daarvoor word hy in die een ontwerpersuitrusting ná die ander uitgevat – klaar net so stylvol soos ouma Gloria Arendz en sy modelmooi ma, Luciana Agostinelli (26).
Kaalvoet kan hy ook nie wees nie. “Waar is sy Hermès-skoene?” vra sy pa, die kunstenaar Massimo Agostinelli (29). En dan kom ’n paar babaskoene van dié Franse modehandelsmerk te voorskyn.
Toe ons fotograaf die kleinman op ’n elegante koningsblou fluweelbank sitmaak, besluit sy pa basta! Net ’n vergulde stoel is goed genoeg vir sy “prinsie”.
Terwyl Gloria en haar man, die Switserse eiendomsmagnaat en sakeman Rolf Theiler (albei 59), op Klosters van die koue bibber, span die Agostinelli’s, hul seun en Luciana se jonger suster, Giorgiana Theiler (20), uit in Enigma, Gloria-hulle se spogherehuis in sonnige Kaapstad. Dit het ’n 3D-fliekteater en meubels en kunswerke uit talle wêrelddele en is een van die duurste, weelderigste huise in die land (My droomhuis, my paradys, 28 Januarie 2016).
Die hele gesin sou oudergewoonte in die Kaap kom vakansie hou, maar weens onvoorsiene omstandighede sluit Gloria en Rolf eers later by hulle aan, sê Luciana. Die modeontwerper Errol Arendz, Luciana se oom, het wel al kom inloer om sy suster se eerste kleinkind te ontmoet. “Hy is versot op hom,” sê Luciana.
En ouma Gloria? “Sy is al een wat hom aan die slaap kan sus,” vertel Massimo. “Ja, sy sit haar musiek aan en dans met hom,” beaam Luciana. “Ek sal hom vir haar gee en sê: ‘Ma, dit is nou speeltyd.’ Maar dan bring sy hom 10 minute later terug en hy is vas aan die slaap.”
KLEIN Rob is met die spreekwoordelike goue lepel in die mond gebore. Vir sy eerste kuier in sy ma se geboorteland is sy Rimowa-tas tot barstens toe vol gepak met