SO HET DIE WÊRELD REAGEER DUITSLAND
“Ek dink ons moet ons voorberei op ’n uitdagende rit,” het Duitsland se visekanselier, Sigmar Gabriel, gesê. Duitsland en die res van Europa sal moet saamstaan om “hul belange te beskerm” en Trump se toespraak het ’n baie “nasionalistiese toon” gehad, het hy bygevoeg. Die bondskanselier, Angela Merkel, het blykbaar besluit om nie die geleentheid op TV te volg nie. Sy is gekiek waar sy tydens die inhuldiging ’n kunsgalery besoek het in Potsdam by die Duitse hoofstad, Berlyn. Sy het ook nie ’n woord oor die dag gerep nie, maar haar woordvoerder het gesê sy sal die situasie “met diep belangstelling” dophou.
RUSLAND
“Ons is gereed om ons kant te bring om die verhouding te verbeter,” het die Russiese eerste minister, Dmitri Medwedef, kort ná die inhuldiging op Facebook geskryf.
ENGELAND
Die eerste minister, Theresa May, het nie enigiets gesê nie, maar die opposisieleier, Jeremy Corbyn, het Trump aangemoedig om sy “vrouehaat en rassisme” te laat staan. Net die minister van buitelandse sake, Boris Johnson, het Trump op Twitter gelukgewens.
CHINA
“Ons sal graag hande vat met Amerika se nuwe administrasie sodat ons konfrontasie en konflik kan vermy en wedersydse respek en ’n wen-wen-vennootskap kan kweek,” het Hua Chunying, ’n woordvoerder, gesê.
MEXIKO
Pres. Enrique Peña Nieto het Trump op Twitter gelukgewens, maar betogers in Mexiko het hom onder meer ’n rassis, fascis en xenofoob genoem. Die nuwe president het in sy inhuldiging s toespraak gedreig dat hy nie sal huiwer om sy land se grense te beskerm nie.
DIE VATIKAAN
Hy bid vir Trump, het pous Franciskus in ’n ope brief gesê. “Ek bid dat u besluite gelei sal word deur die ryk geestelike en etiese waardes wat die geskiedenis van die Amerikaanse volk help vorm het,” skryf hy onder meer. Hy hoop ook Trump gee aandag aan die armes, uitgeworpenes en behoeftiges. “Ek gee u my goeie wense en bid dat God u die wysheid en krag sal gee wat u nodig het in u hoë amp.”
ISRAEL EN PALESTINA
Die Israeliese eerste minister, Benjamin Netanyahu, het Trump gelukgewens en amptenare het gesê hulle hoop hy maak werk van sy belofte om die Amerikaanse ambassade in Israel van Tel Aviv na Jerusalem te skuif. Palestyne is boos oor dié voorneme, want hulle beskou Jerusalem as ’n toekomstige hoofstad vir hulself. BRONNE: REUTERS.COM, THEGUARDIAN.COM, DW.COM, EDITION.CNN.COM, FOXNEWS.COM