Ontmoet van die reuse in rugby
Frankryk se tamaai Uini Atonio is nou in die kollig. Hier is nog rugbyreuse
UINI ATONIO Stut: 155 kg
Dié seun van Samoane is in 2011 deur die Franse klub La Rochelle gewerf. Sy gewig is ook al as 146 kg aangegee, maar op sy swaarste weeg hy dubbel soveel soos blitsbukse soos die All Black Damian McKenzie. Uini is ’n kragtige skrumwerker en baldraer. Kolosse soos hy bou soveel momentum op die veld op dat rugbybeserings wat hulle veroorsaak nou met dié in padongelukke vergelyk word.
WILL SKELTON Slot: 140 kg
Die oudste van drie Skeltonbroers dra ’n no. 19-stewel en het 150 kg geweeg toe hy jonger was, maar 10 kg afgeskud vir sy ideale speelgewig. Die Wallaby beskou homself as meer as bloot ’n groot lyf. “Ek’s nie net ’n stormram nie; ek kan ook die bal versprei.” Sy “kleinboet”, Cameron, wat Samoa op die Junior Wêreldkampioenskapsbyeenkoms verteenwoordig het, is selfs groter as hy.
OPETI FONUA Losvoorspeler: 135 kg
Die Engelse klub Newcastle Falcons se agtsteman van Tongaanse afkoms is ’n drieëmasjien bekend vir sy vaart. ’n Stormlopie van hom toe Jonny Wilkinson hom vir die Franse klub Toulon probeer keer het, is op YouTube verewig. Jonny, Engeland se 2003-Wêreldbekerheld, is bekend vir sy vreeslose lakwerk, maar Opeti het hom soos ’n lappop meters ver deur die lug laat trek.
JAMES HASKELL Losvoorspeler: 120 kg
Jy kan maar sê hy is die Britse rugbywêreld se Kardashian. James is ewe bekend vir sy oefen- en eetplanwenke as vir sy eskapades saam met sy modelmeisie, Chloe Madeley. Om sy reuselyf te voed, eet hy ’n 4 200 kJ-ontbyt met hawermout, vier gekookte eiers, roosterbrood en ’n paar proteïenpannekoeke. En dis net die eerste van vyf etes.
MATHIEU BASTAREAUD Senter: 120 kg
Hy het al digby 40 toetse vir die Hane gespeel en is die een derduiwel wat Uini al in sy spore kon stuit. Toe dié verlede maand tydens ’n wedstryd in die Franse Top-14 op Mathieu afpyl, het almal verwag hy sou afgedra moes word, maar dit was Uini wat bly lê het. Een ontleder het die voorval beskryf as “rugby se onweerstaanbare krag wat ’n onbeweeglike voorwerp tref’’.
EBEN ETZEBETH Slot: 118 kg
Hy is een van die sterkste en mees atletiese vaste voorspelers in toprugby en word beskou as die man wat Bakkies Botha se mantel as Bok-”enforcer” oorgeneem het. Dié Stormer het dit onlangs tydens ’n relletjie met die Blues se Sonny Bill Williams gewys. Eben, bekend vir sy bolyfkrag, is ’n broerskind van Cliffie, ’n oud-WP-slot en Springbokstoeier.
SONNY BILL WILLIAMS Senter: 110 kg
Van sy Samoaanse pa het hy die Suidsee-gene geërf wat soveel groot, atletiese spelers kenmerk. Buiten twee Wêreldbeker-, twee rugbyliga- en ’n Superrugby-titel hou hy ook sewe swaargewigboksseges. SBW reken die “boks maak my ’n beter rugbyspeler, help met konsentrasie en waarneming”. Hy eet ’n paar groot maaltye per dag. Salm en soetpatat is van sy gunstelinge.
GEORGE NORTH Vleuel: 108 kg
Hy is al bestempel as die “Walliese Jonah Lomu’’ en onlangs as Wallis se antwoord op Mathieu. George was net 18 toe hy twee drieë in sy toetsdebuut teen Suid-Afrika druk. Toe Israel Folau, ’n groot Australiese agterspeler, hom tydens die vorige toer van die Leeus probeer lak, het George hom oor sy skouer gegooi en ’n ent met hom gehardloop.