IS MY KIND TRANSGENDER?
’n Meisie wat weier om rok te dra of ’n seun met ’n voorliefde vir hoëhakskoene beteken nie hulle sal transgender wees nie.
Dit kan net een van vele maniere wees waarop alle kinders eksperimenteer met watter gender hulle gemaklik laat voel, verduidelik Ronald.
Tussen twee- en vyfjarige ouderdom is dit deel van ’n kind se normale ontwikkeling om met die uitdrukking van gender te eksperimenteer. Nuuskierigheid hieroor is nie dieselfde as ’n kind se genderidentiteit nie.
Van die kinders wat met geslagsrolle eksperimenteer, sal ’n baie klein persentasie eindelik wel transgender wees. Maar by tieners met genderdisforie is die persentasie aansienlik hoër.
In studies is bevind tot 60% van kinders wat in hul kinderjare deur kenners as transgender geïdentifiseer is, het hulle in hul adolessensie as gay, lesbies, biseksueel of met ’n ander seksuele identiteit geïdentifiseer, kom in die BBC-dokumentêr na vore.
As jou kind vir jou sê hy of sy is ongemaklik met sy gender, is dit raadsaam om eers jou huisdokter te spreek of ’n organisasie soos GenderDynamiX te kontak.
Wat is geslag?
Dit word bepaal deur die biologiese geslagsorgane en gene waarmee jy gebore is en wat as sodanig by geboorte deur die dokter so geïdentifiseer is.
Wat is gender?
Dit is die geslag waarin jy gemaklik voel en in jou binneste weet jy is. Genderidentiteit is of jy jouself as ’n man of vrou beskou, of dalk as geeneen van die twee nie, verduidelik Delene van Dyk, ’n Suid-Afrikaanse opvoeder in seksualiteit van die webtuiste mysexualhealth.co.za.
Die samelewing verwag ’n man sal sterk en analities wees en ’n vrou sag en emosioneel. Die ironie is elke mens, ongeag hul geslag, moet manlike én vroulike eienskappe hê om ’n gebalanseerde mens te wees, sê Delene.
Transgender
is nie ’n diagnose nie, maar ’n beskrywende term, sê die transgenderspesialis Ronald Addinall. Trans mense voel hulle is met die verkeerde biologiese geslag gebore, maar dit het niks te doen met hul seksuele oriëntasie nie.
Gender-niekonformerend
beteken iemand dra nie noodwendig die klere wat die samelewing meen by vroue of mans tuishoort nie. Dis ook iemand soos ’n beroepsvrou wat haarself as sterk en analities beskou, verduidelik Delene, of ’n tuisblypa wat nie konformeer met die samelewing se idee van die manlike rol as broodwinner nie.