Sektelyer se val ná verkragtings
Die leier van ’n Indiese sekte is in die tronkronk vir sy ‘reinigingsdade’ met vroue, maar sy volgelinge verafgod hom steeds
VIR sy geskatte 60 miljoen volgelinge wêreldwyd was hy hul flambojante ghoeroe, ’ n kleurryke figuur wat selfs die hoofrol in sy eie flieks vertolk het. Maar weg van die kollig was Gurmeet Ram Rahim Singh (50), hoof van die Indiese sekte Dera Sacha Sauda (DSS), allesbehalwe heilig.
’n Indiese hof het bevind sy “geestelike reinigingsdade” was in sommige gevalle niks minder nie as verkragting – en hom vir 20 jaar tronk toe gestuur.
Die bebaarde ghoeroe, sakeman en vermaakster se politieke mag en sosiale invloed was so groot, dit het die Indiese owerheid 15 jaar geneem voor hy onlangs skuldig bevind is aan seksuele misdade teen twee van sy vrouevolgelinge. Singh het in ’n konvooi van 100 motors by die hof opgedaag, waar tienduisende ondersteuners hom ingewag het. Hy het volgehou hy is onskuldig.
Nadat hy skuldig bevind en gevonnis is, het sy volgelinge op dorpe oor Indië heen treinstasies en mediabussies aan die brand gesteek, motors beskadig en met die polisie slaags geraak.
In Panchkula in Indië se noordelike staat Haryana, waar Singh reusagtige steun het, is 38 mense in die oproer dood en 264 beseer.
Die ondergang van die selfaangestelde “Boodskapper van God” het in 2002 begin nadat ’n vrouebewoner van die sekte se hoofkwartier ’n naamlose brief aan die destydse premier van Indië, Atal Bihari Vajpayee, gestuur het. Daarin het sy beweer die ghoeroe het haar en verskeie ander sadhvi’s (vrouevolgelinge) verkrag.
Die meisie, wie se ouers haar glo oorreed het om haar lewe aan die sekte te wy, het verduidelik sy is eendag na Singh se “gufa”, sy privaat woonplek, ontbied. Daar het Singh blykbaar vir haar briewe gewys wat ’n seun wat haar in haar studentedae gepes het, geskryf het.
“Singh het my gevra of ek enige foute in my vorige lewe gemaak het. Toe vertel ek vir hom ek het in my kollegedae een seun geken en hy probeer my seker belaster,” vertel sy.
“Daarna het hy vir my gesê: ‘Jy het ’n sadhvi geword en nou het ek beheer oor jou liggaam en verstand. Jy het apavitar (onrein) geword en met hierdie daad sal ek jou reinig.’ ”
Die vrou beweer die ghoeroe het haar toe verkrag en ook verskeie kere daarna. Volgens haar het baie ander meisies dieselfde verduur, hoewel net een ander slagoffer teen Singh getuig het. In haar brief beweer sy ook Singh het vir haar gesê geen owerheid kan hom vervolg nie.
GURMEET Ram Rahim Singh is in die westelike Indiese staat Rajasthan gebore. As kind is hy deur sy pa aan die sekte bekendgestel en op 23 jaar het hy die hoof daarvan geword. Onder Singh se leierskap het die sekte met sy hoofkwartier, Dera, in die stad Sirsa in Haryana, sowat 260 km van Nieu-Delhi, baie gegroei. Dit het nou glo sowat 50 takke en 60 miljoen volgelinge. Die meeste is in Indië, maar baie woon in lande soos Brittanje en Australië.
Sy volgelinge het almal dieselfde geskepte van aangeneem, Insan (mens), om hul eenheid aan te dui en die assosiasies van hul individuele vanne te verwyder. Dera huisves glo sowat 1 000 volgelinge en het ’n rolprentteater, hotel, sportstadion en skole.
Vir sy miljoene ondersteuners, meestal minderbevoorregtes uit die laer kastes, het hy ’n nederige bestaan gepredik, maar hyself het in weelde geleef. Volgens ’n joernalis wat Singh se uitgestrekte hoofkwartier besoek het, is die geboue so eksentriek soos die ghoeroe se veelkleurige uitrustings. Hy beskryf vensters in die vorm van ’n mens se oor en turkoois mure met veelkleurige watertenks daarop.
“Dit het vir my gelyk asof hy ’n ghoeroe is wat sy drome en fantasieë – rolprentster, popsanger, weldoener, politieke invloedryke – deur sy sekte uitleef,” het die BBC-joernalis berig. “In die proses laat hy ook sy volgelinge groot droom.”
Rockstar-baba, soos baie mense hom noem (in Indiese tale is “baba” ’n eerbiedige aanspreekvorm soos “meester”), was die hoofakteur in sy selfvervaardigde en uitspattige rolprente. Hy was ook die hoofsanger op buitelugkonserte, met sy volgelinge as gehoor.
Van sy eerste musiekalbum, met die vreemde titel Highway Love Charger, is 3 miljoen kopieë in die eerste drie dae verkoop. Die musiekvideo vir die hoofenkelsnit is al 4 miljoen keer op YouTube gekyk.
Die ghoeroe se maatskaplike impak is net so verreikend en boeiend.
Hy het verskeie welsynorganisasies en veldtogte bestuur om die skenking van bloed, oë en kadawers te bevorder. Hy het in ’n stadium verskeie Guinnesswêreldrekords opgestel, onder meer vir die neem van die meeste bloeddruk-, diabetes- en cholesterollesings in 24 uur. In 2001 het hy ’n hulpverleningsagentskap met die ellelange naam Shah Satnam Ji Green S Welfare Force Wing gestig. Die agentskap help slagoffers van siklone en aardbewings in Indië.
Maar hy het sy invloed ook op omstrede wyses gebruik.
Volgens die sentrale ondersoekburo van Indië het Singh twee jaar gelede sowat 400 van sy volgelinge gemanipuleer om aan massakastrasies deel te neem. Hy het hulle oortuig dit was die enigste manier om persoonlik met God ’n band te vorm
MET meer as 20 miljoen volgelinge net in noordelike Indië het die ghoeroe aansienlike politieke invloed gehad. Tydens Indiese verkiesings het hy sy volgelinge gevra om sekere politieke partye of kandidate te steun.
Jare nadat die meisie haar verkragtingsverhaal aan topstaatslui gestuur het, is niks daaromtrent gedoen nie. Eindelik het die hooggeregshof van Pandjab en Haryana ’n ondersoek gelas.
“Voorheen het die regering alles probeer om die misdadige, selfgeskepte godman te beskerm,” beweer M. Narayan, die uitgetrede amptenaar wat die ondersoek gelei het. “Sy magtige invloed oor sy vol- gelinge se stemme in ’n verkiesing het die politieke stelsel verlam en die oppergesag van die staat jaar ná jaar bespot.”
En al het Singh reeds 20 jaar tronkstraf gekry, is dit dalk nie die einde van sy regsprobleme nie. ’n Prokureur vir die slagoffers sê nog “40 tot 50 vroue” het met bewerings van verkragting na vore gekom en hulle sal vra dat die saak verder ondersoek word.
Die Indiese owerheid sê ná sy skuldigbevinding is “18 meisies van onder 18 jaar oud uit Dera geneem” om medies ondersoek te word. Singh staan ook tereg op die moorde van die joernalis Ram Chander Chhatrapati en die voormalige sektelid Ranjit Singh.
Ram het stories oor die beweerde “wandade” van die sekte gepubliseer en Ranjit was glo sy informant.
TYDENS die verkragtingsverhoor het regter Jagdeep Singh die vonnis van 20 jaar geregverdig deur te sê die ghoeroe verdien die “hoogste. straf ”, want hy het hom “as ’n godman voorgehou en onbehoorlike voordeel uit sy posisie en gesag getrek”.
“Die slagoffers het die skuldige op die voetstuk van ‘god’ geplaas en hom vereer. Maar die skuldige het ’n skending van die ergste aard gepleeg deur sulke liggelowige volgelinge seksueel aan te rand,” het die regter ter afsluiting gesê.
Maar te oordeel na die oproer ná Singh se vonnisoplegging het die regter se uitspraak min gedoen om die “ghoeroe van blieng” se reputasie te bevlek. Sy volgelinge verafgod hom steeds.
“Hy kan niks verkeerds doen nie,” het Rajkumar, ’n winkeleienaar van Haryana, aan joernaliste gesê. “Hy werk om die wêreld van al sy probleme te verlos.”