HOE BESKERM JY JOU KIND?

Ouers moet hul kinders van jongs af opvoed oor wat aanvaarbaar is in die sosiale media, sê Corné Peach, ’n kliniese sielkundige van Kempton Park. “Die gesprekke moet gereeld plaasvind en ’n vertrouensverhouding moet tussen ouer en kind geskep word. Verduidelikings oor kaalfoto’s en vreemdelinge moet deel wees van die ouer se seksopvoeding aan die kind. Die regte tyd hiervoor is sodra jou kind ’n selfoon of tablet en toegang tot die internet het,” sê sy.

Kinders moet leer nie almal het goeie bedoelings nie en aanlyn is mense nie aldag wie hulle voorgee om te wees nie, sê sy.

“Eerlike, reguit en openhartige gesprekke is die beste. Al is dit vir sommige ouers ongemaklik, is dit in jou kind se belang. ’n Ingeligte kind sal hom of haar veel beter kan beskerm,” verduidelik Corné. Sy meen kinders moet verstaan inligting en foto’s kan maklik in die verkeerde hande beland.

Volgens prof. Esmé van Rensburg, dosent in kinderpsigopatologie en -terapie aan die Noordwes-universiteit, moet ouers hul kinders se sosialemediagebruik monitor.

Kyk gereeld na jou kind se soekgeskiedenis ( browse history) en aanlyn vriende. “Doen spot checks op jou kinders se media, al haat hulle jou daaroor.”

Dr. Tessa van Wijk, ’n traumatoloog van Lichtenburg, waarsku kinders word dikwels mishandel of geboelie deur iemand wat hulle ken en vertrou. “Dit maak dit moeiliker om ’n kind te waarsku teen vreemdelinge.”

Sy stel voor ouers leer hul kinders van kleins af om te onderskei tussen emosies soos vrees, hartseer, onsekerheid, vreugde en opwinding. “Vra hoe dit of dat hulle laat voel. Leer jou kind waarskuwingstekens vir wanneer iets nie reg voel nie, soos: ‘My hart klop vinniger, my spiere trek saam, my liggaam bewe liggies, ek het vlinders in my maag of ek het ’n ligte hoofpyn,’ ” is haar raad.

Kinders moet gereeld oefen om hul emosies te identifiseer en daarvolgens te reageer. “Leer jou kind die verskil tussen veilige en onveilige geheime – hulle moet weet waar die streep getrek word,” sê Tessa.