SELENA SE GEHEIME MEDIESE STRYD
SELENA GOMEZ (regs op foto bo) het gewys hoe dapper sy teen teëspoed baklei toe sy onlangs bekendmaak sy het in Mei vanjaar heimlik ’n nieroorplanting ondergaan, en haar beste vriendin, die aktrise Francia Raisa (29), was haar skenker.
Die 25-jarige sangeres en aktrise het foto’s van hulle wat in ’n hospitaalbed lê op Instagram gedeel en geskryf: “Ek is bewus van my aanhangers het agtergekom ek was ’n deel van die somer skaars en het gewonder hoekom ek nie my nuwe musiek . . . bemark nie. Ek het uitgevind ek het weens my lupus ’n nieroorplanting nodig en het van die operasie herstel. Ek moes dit doen ter wille van my algehele gesondheid.”
Selena het twee jaar gelede haar lupusdiagnose in ’n onderhoud met die tydskrif Billboard bekendgemaak. Dis ’n chroniese outo-immuunsiekte waar die immuunstelsel sy eie weefsel en organe aanval. “Dit word nog baie misverstaan, maar navorsing vorder,” het sy op Instagram geskryf.
Selena het danksy die liefde en steun van haar gesin en kêrel, The Weeknd (27), wat glo al sy werkverpligtings rondom sy meisie se behandeling beplan het, goed herstel en werk weer.
Sy is onlangs gekiek waar sy haar litteken blootstel op die New Yorkse stel van ’n nuwe Woody-Allen fliek, wat nog ’n titel moet kry.
Sy het glo nie haar ekskêrel Justin Bieber oor haar oorplanting ingelig nie, hoewel hulle vier jaar lank saam was en dieselfde kerk, Hillsong, bywoon. Volgens iemand in die binnekring is die twee nie in aanraking met mekaar nie. “Hulle praat nie.” BRONNE: EW, ETONLINE