MEDIES: KIES REG
Hospitaalplanne, omvattende dekking, netwerkopsies . . . Besluit watter opsie vir jou die beste is
AS JY lid is van ’n mediese fonds, het jy tot 15 Desember kans om jou voordeleopsie vir 2018 te verander. Oorweeg jou gesin se omstandighede: Hoeveel is julle; hoe is jul gesondheid; wat kan jy bekostig? Besluit dan watter opsie die beste vir julle sal wees.
HOSPITAALPLANNE KITSFEITE
▶ Dit omvat gewoonlik dekking vir alle koste tydens hospitalisasie en sekere buite-hospitaalvoordele soos chroniese medikasie en skanderings. ▶ Dit sluit in wetlik verpligte dekking van voorgeskrewe minimum voordele (VMV) vir die diagnose, behandeling en sorgkoste van sekere siektetoestande, byvoorbeeld kanker, diabetes en noodgevalle (soos gelys op www.medicalschemes.com), asook chroniese medikasie daarvoor.
ONTHOU
▶ As jy byvoorbeeld na ’n spesialis gaan wie se tariewe duurder is as die fonds se betalingskoers, sal jy die verskil self moet betaal. Daar kan ook bybetalings wees op hospitaalprosedures soos sekere skanderings, gastroskopies en die trek van verstandtande. Dit moet in jou kontrak staan. ▶ Lede is verantwoordelik vir mediese uitgawes buite die hospitaal of dié wat nie deur jou spaarplan gedek word nie. Gestel jy het glad nie ’n spaarplan nie, sal jy in elk geval vir ’n doktersbesoek, X-strale, pato- logiese toetse of medisyne moet betaal as jy dit nie tydens hospitalisasie kry nie. As jou spaarplan se geld op is, betaal jy ook self.
SPAAR SO: Oorweeg ’n hospitaalplan met ’n netwerkopsie, sê Karin Andrea van Optivest Health. Mediese fondse beding met privaat hospitaalgroepe tariewe om koste te beperk. Vind uit watter privaat hospitaal naby jou ’n gekontrakteerde netwerkhospitaal is. Deur van jou bestaande hospitaal- na die netwerkplan te verander bespaar jy sonder om voordele te verloor. Momentum se Custom Any Hospital-plan kos R4 336 per maand vir ’n gesin van twee volwassenes en twee kinders. Hul netwerkweergawe, die Custom Associated Hospitalsplan, kos R3 367. Jy bespaar dus R969.
VIR WIE KAN DIT WERK?
▶ Jong en gesonde lede wat nie gereelde uitgawes het nie, is gewoonlik gelukkig met net ’n hospitaalplan. ▶ Dis nuttig vir individue of gesinne wat gereelde uitgawes self kan finansier, maar hulself wil beskerm teen onverwagte groot uitgawes.
OMVATTENDE PLANNE KITSFEITE
▶ Omvattende mediese dekking wissel volgens mediesefondsreëls, maar dek jou grotendeels vir daaglikse uitgawes buite hospitalisasie, soos doktersbesoeke, voorskrifmedikasie, tandheelkunde, X-strale, patologiese toetse en hospitaaluitgawes. Dit dek ook VMV. ▶ Elke fonds het opsies met verskillende dekking. Jy kan ’n billiker of duurder een kies. Hoe duurder, hoe meer dekking. Sommige opsies sal jou gesin se oogartsdekking beperk tot R2 000 per jaar. Dieselfde fonds kan egter ook ’n duurder, omvattende opsie hê wat oogarts- en verwante uitgawes tot R6 000 per jaar dek.
SPAAR SO: Hoe beter die voordele, hoe duurder die dekking. Maar die omvattender planne bied ook netwerkopsies waar jy net sekere privaat hospitale kan gebruik. Vir ’n gesin van twee volwassenes en twee kinders is Medihelp se premie vir hul Dimension Prime 3 Network (die netwerkopsie) R5 706 per maand, terwyl Dimension Prime 3 R7 146 kos. Die verskil is R1 440.
VIR WIE KAN DIT WERK?
▶ Mense met duur behandeling vir spesifieke siektetoestande of chroniese uitgawes. ▶ As jy nie self genoeg kan begroot vir uitgawes nie. ▶ Ouer mense of gesinne met klein kinders.