Duane Williams (26)
Dit was ’n groot “seën” vir dié Kapenaar toe hy die oproep kry dat hy die rol van die flambojante en modebewuste Vernon gaan vertolk in dié sepie wat sy gesin al soveel jare kyk. Hy het in Hillview op die Kaapse Vlakte grootgeword in ’n gemeenskap vol dwelms en bendegeweld, vertel Duane. Sy enkelma, Gloria (55), het hard gewerk om vir hom en sy broer, Matthew (21), die beste te gee. Duane is met ’n liefde vir toneelspel gebore en is ’n danser van formaat. Hy was al te sien in internasionale dansflieks soos Honey 3: Dare to Dance en Bring It On: Worldwide #Cheersmack saam met die Hollywood-ster Vivica A. Fox. Tog was hy ietwat senuagtig voor sy eerste dag op die 7de Laan-stel en sy eerste groot TV-rol. “My lyf het gebewe en my hande het gesweet,” bieg hy. Maar die senuwees was gou vergete. Duane was in sy noppies om die aktrise Annelisa Weiland, oftewel Hilda, te ontmoet. “Sy het ’n sagte hart en is baie snaaks.”
KITSFEIT
Charlize Theron het hom geïnspireer om ’n akteur te word. “Haar suksesverhaal het my gewys ek as Suid- Afrikaner kan enigiets doen.”