EEN VRAAG AAN CARIN OOR BOELIES

Elton kry swaar onder Popeye en Bulldozer. Afknouery deur boelies is wêreldwyd algemeen. Is dit ’ n saak wat jy graag wou aanraak? “In die konteks van die mees onlangse tragedies van boelies in ons skole wat nie betyds gestuit is nie, is die jongste Elton-boek beslis relevant.

“In baie gevalle laat die skoolstelsel en volwassenes kinders in die steek wanneer hulle deur boelies geteister word.

“Maar dis ook belangrik om te weet dat dit baie moeilik is om ’n kind wat ’ n gesonde selfbeeld en genoeg selfwaarde het te boelie.

“As ouers, onderwysers en ondersteuners is ons verantwoordelikheid dus nie net om boelies hok te slaan nie, maar om vir die slagoffers geleenthede vir suksesbelewing te skep.

“Elton ontdek byvoorbeeld sy kunstalent deur tannie Kameel en kry erkenning vir sy (onbeplande) noodhulpkursus.

“Wanneer hy die geleentheid het om die boelie vas te vat, besef hy dis onnodig om ook ’n boelie te wees nie: Die lewe sal self die boelie op sy plek sit.”