SEAN VAN NOORDWYK
(23) Sy karakter, Reitz Bekker, laat harte galop wanneer hy sy hemp in die Stryders se kleedkamer laat waai. Tog bieg Sean: “Ek was in ’n stadium nogal oorgewig.”
Hy het in 2013 drama aan die Universiteit Stellenbosch studeer toe hy besef hy wil as akteur gemaklik in sy eie vel voel. Hy het begin konsentreer op wat hy eet en gereeld geoefen.
Sean oefen nou sewe dae per week en kies sy kos so natuurlik moontlik. Die resultate is duidelik, maar hy beskou homself glad nie as ’n hartebreker nie.
“Ek is nie baie selfversekerd nie. Dis dalk omdat dit steeds in my onderbewussyn vassteek dat ek harder en harder moet werk.”