VALDA JANSEN
“Ek lees graag gedigte en was aangenaam verras deur Jolyn Phillips se wonderlike bundel Radbraak. Dit het vanjaar verskyn en staan kop en skouers uit bo verskeie ander Afrikaanse digbundels. Daar was slim eksperimente, maar ek voel gedigte moet my aan die hart raak, en dít doen Radbraak. Die gedigte is mooi, gevoelvol, nuut en anders.
“Elena Ferrante se reeks boeke oor twee beste vriendinne se lewenspaaie van geboorte tot hul oudag het my maande lank vasgenael gehou. My Brilliant Friend is my gunsteling.” Hy Kom met die Skoenlappers (Human & Rousseau, R179*), wat onlangs met die Jan RabieRapport-prys vir debuutfiksie bekroon is, is die verhaal van ’n verlore liefde tussen ’n Duitser en ’n Suid-Afrikaanse vrou. Jare ná die verhouding, toe sy haar man in Johannesburg agterlaat en met haar kind Kaap toe trek, besin sy oor haar besluit om weg te stap.