IS DAAR HOOP?

Omdat Danelene Meyer se kinders in Griekeland gebore en getoë en onder Griekse jurisduksie is, sal dit moeilik wees om hulle by haar in Suid-Afrika terug te kry, meen Bertus Preller, ’n Kaapse familieregprokureur.

’n Beslissing oor toesig kan dus nie deur ’n Suid-Afrikaanse hof afgedwing word nie. Daarom sal sy opnuut ’n hofstryd om toesig oor die kinders in ’n Griekse hof moet aanknoop, sê hy.

Dit kan lank duur en sal nie noodwendig slaag nie. “Die Griekse howe kan besluit die kinders het al aangepas en dis in hul beste belang om daar te bly,” sê Bertus.

Suid-Afrika en Griekeland het albei die Haagse Konvensie oor Kinderontvoering onderteken. As ’n kind deur ’n ouer sonder die ander ouer se toestemming na sy of haar land gebring word, kan die dispuut daarvolgens opgelos word.

Maar dié regsproses moet binne ’n jaar ná die kinders se vertrek geskied, anders sal die howe gewoonlik in die guns van die ouer beslis in wie se sorg die kinders reeds is, sê Bertus.

Steve Mahlangu, ’n woordvoerder van die Suid-Afrikaanse departement van justisie, meen die regering kan Danelene help. Sy moet ’n vorm invul en dokumente soos haar kinders se geboortesertifikate, die egskeidingsbevel en ’n verklaring oor hoe haar regte as ouer geskend is aan hulle verskaf, sê hy.

Danelene het aan Huisgenoot gesê sy was nie bewus van hierdie opsie nie en sal wel daarvan gebruik maak.