STRES OOR EKS SE NUWE VROU
Ek het ’n seuntjie van ses en is ’n paar jaar gelede van sy pa geskei. Ek het aansoek gedoen om verhoogde onderhoud omdat hy nou na ’n skool vir kinders met spesiale behoeftes gaan.
My gewese man het onlangs weer getrou, maar ek weet nie op watter huweliksvoorwaardes nie.
Hy en sy nuwe vrou het nie kinders nie en albei het ’n goeie werk.
Ek is bang sy gaan saam met hom kom wanneer ons ’n afspraak met die onderhoudsbeampte by die hof het. Mag sy daar wees?
DF op HA
Slegs die ma, die pa en hul regsadviseurs word in die hofvertrek toegelaat wanneer sulke verrigtings begin. Jou eks se vrou kan wel toegelaat word, maar slegs as jy daartoe instem. As sy dalk net binnestap sonder om vooraf toestemming te vra, bly kalm, kyk voor jou uit en tel tot by 10. Die voorsittende beampte moet jou dan vra of dit reg is met jou dat sy daar is.
As jy daarmee ontevrede is, het jy die volste reg om nee te sê.
Die beampte moet haar dan vra om die verrigtinge te verlaat.
Al wanneer sy teenwoordig mag wees, is as sy gedagvaar sou word om ’n bydrae in die hofvertrek te lewer.
Sulke dae is ekstra moeilik vir enkelma’s. Maak dit vir jouself makliker deur minder op jou eks se nuwe vrou te konsentreer en eerder toe te sien dat ’n geldige nuwe onderhoudsbevel gemaak word sodat jou kind se pa nie van sy verpligtings kan wegskram nie. Sorg dat jy genoeg steun van familie en vriende voor en ná die tyd kry.
As jy meer wil weet oor aansoeke om onderhoud, klik gerus op http://www.justice.gov.za / services/ apply-for-maintenance.html.
Die volledige onderhoudswet is beskikbaar by http://www.justice.gov.za/legislation/acts/acts_full. html.