Kies die regte glas
Ken jy nie die verskil versk tussen ’n martini- en ’n whiskyglas nie? Ons kom tot jou redding met ons nuttige drinkglasgids
MARTINI- OF SKEMERKELKGLAS
Jy het James Bond seker al by die kroeg sien ontspan met so ’n glas in die hand; die spioen se gunstelingdrankie word immers in dié mooi langsteelglas voorgesit. Deesdae word heelwat ander skemerkelkies ook daarin voorgesit, soos die Sex and the City-vroue se pienk cosmopolitans. Die lang steel keer dat jou hande jou drankie warm maak.
WYNGLAS
Ken die verskil tussen rooi en wit. ’n Rooiwynglas het ’n breër rand en groter bol, wat die aroma en geur verbeter. ’n Witwynglas is meer U-vormig; dit help jou drankie langer koel bly.
WHISKYGLAS
’n Whiskyglas is kort en het ’n dik boom. Die breë rand maak dit maklik om ysblokkies by te voeg of bestanddele te meng as jy ’n drankie op ys berei.
SJAMPANJEGLAS
Sjampanjeglase is in verskeie vorms en groottes te kry.
Tulp Die glas is gevorm soos die blom waarna dit genoem is; dit is groter bo en kleiner na die steel toe.
Fluit Die vorm keer dat die drankie te vinnig verslaan.
Piering Dié ouderwetse glas belug die sjampanje, wat die borrels verminder.
LAMPGLAS
As jy van piña colada hou, moet jy vir jou ’n stel lampglase kry. In Engels word dit ’n hurricane- glas genoem, na die skermerkelkie van rum, vrugtesap en stroop met dieselfde naam. Dit is langer as ’n lang glas en soos ’n vaas gevorm. Die grootte maak dit volmaak vir lang drankies met fyn ys.
LANG GLAS
Dié veelsydige glas kan vir verskeie drankies gebruik word, van gaskoeldrank en tonikum tot mojito’s. Dit is langer en dunner as ’n whiskyglas, wat keer dat jou drankie te gou verslaan.