Sara Se Geheim is terug
Drama, intrige en donker geheime . . . Hier is alles wat jy oor die tweede seisoen van dié boeiende trefferreeks moet weet
1 Dié kykNET-dramareeks draai om Sara Abrahams ( June van Merch) wat al 35 jaar lank ’n groot geheim met haar saamdra. Haar dogters, Maggie (Lee-Ann van Rooi) en Lizzie (Quanita Adams), dink hul broer, Johnny (Dawid Minnaar), is in die vroeë tagtigerjare tydens politieke onluste oorlede. Maar hy leef. Hy moes jare gelede as bruin tienerseun sy identiteit vir dié van Johan, ’n wit man , verruil. Sara werk boonop deesdae as huishulp in haar seun se huis. 2 Die tweede seisoen trek weg waar die eerste een geëindig het. Ricky (Brendon Daniels) spring wonderbaarlik die dood vry nadat Maggie hom op ’n boot geskiet en met haar man, Virgil (Charlton Lee George), se hulp oorboord gegooi het. Dié weet nou sy oudste seun, Aiden (Marlo Minnaar), is nie sy kind nie. Gaan Aiden uitvind Ricky is sy biologiese pa? 3 Daar is ’n hele paar nuwe gesigte in die jongste seisoen, onder andere Albert Maritz, wat die regter Eben Pretorius speel, die Kwêla-aanbieder, Hannes van Wyk (Dawie), Stian Bam (Renier) van Die Boekklub-faam, Schalk Bezuidenhout (Vader Steve) en Elana Afrika-Bredenkamp (Rebecca). 4 ’n Hele paar kinkels wag. Sanel (Nicola Hanekom), wie se man, Ebert (André Weideman), haar verneuk het, se stryd teen Alzheimersiekte gaan ’n dramatiese wending neem. Koos (Elton Landrew) kry ’n aanbod op tant Marie se plaas wat hy nie maklik van die hand kan wys nie. Dinge lol verder toe Lizzie begin vermoed haar ma het geweet haar man is ontrou. 5 Johan se donker herkomsgeheim kan moontlik nie net sy sakeonderneming nie, maar ook sy huwelik met sy vrou, Nicola (Natania van Heerden), en dogter, Inge (Lise-Marié Richard son), op die spel plaas. Sara smeek hom om die waarheid te vertel, maar sal hy dit oor sy hart kan kry? 6 Die beweerde Astonia-verkragters se verhoor begin. Gerhard (Edwin van der Walt) is gerus, want sy pa (Hannes van Wyk) is welgesteld en iemand met aansien. Sy pel Tyrone (De Klerk Oelofse) kan egter nie ’n duur verdedigingspan bekostig nie. 7 Die reeks speel in en om Athlone op die Kaapse Vlakte en Durbanville in die noordelike voorstede van Kaapstad af. Die Kaapse akteur Keeno Lee Hector, wat die pastoor speel, is ook oorweeg as Lizzie se sangerman, Danny, omdat Keeno Lee ook ’n sanger is. Die rol van Danny het toe gegaan aan ’n ander Kapenaar, Keenan Arrison. 8 Die Slap Snoek-viswinkel is in werklikheid net dit – ’n viswinkel! Tydens verfilming is klante met kameras begroet wanneer hulle by die winkel ingestap het om ’n bestelling te plaas. 9 Die gepekelde uie waaraan die lawwe Lizzie so lekker smul by haar werk in Die Slap Snoek is in werklikheid Quanita, wat dié karakter vertolk, se gunsteling. Sy het sommer op die stel ook daarvan geëet. 10 Ses skrywers is vir die tweede seisoen van Sara Se Geheim verantwoordelik. Hieronder is Roberta Durrant, wat onder meer die regie vir die bekroonde rolprent Krotoa (2016) behartig het.
Sara Se Geheim word Dinsdae om 20:00 op kykNET uitgesaai. Lees nog oor Lise-Marié Richardson, wat Inge speel, op bl. 69.