Local Is Lekker
Die rooitapyt by Wonderlus se première in Johannesburg het op 18 April behoorlik van jong sterre geskitter. Die rolverdeling van dié rolprent, oor ’n Hoëveldse troue wat skeefoop, loop oor van vars gesigte wat die Afrikaanse vermaakbedryf aan die gons het.
Lea Vivier, wat in die fiek haar debuut op die silwerskerm maak, was “opgewonde maar ook senuagtig” oor die groot aand. Haar rol as ’n kelnerin wat onwillekeurig by ’n deurmekaarspul van gebeure betrokke raak, het haar op verlede jaar se kykNET Silwerskermfees in Kaapstad die prys vir beste aktrise besorg.
Die jong ster, wat nou in die kykNET-komedie Mense Mense speel, was in haar oorlede ouma Trix se broekpak en ousus Trix Vivier, ook ’n bekende aktrise, se geel tossel-oorbelle uitgevat.
Simoné Nortmann, wat in ’n skelpienkrok deur Suné Snyman geklee was, en Mila Guy, in ’n groen fuweelpak, het saam-saam vir die kameras op die rooitapyt geglimlag. Die twee aktrises is in die regte lewe woonstelmaats. In die rolprent vertolk Simoné die rol van Lindie, “die kwaai een”, terwyl Mila die volwasse bruid speel.
Edwin van der Walt vertolk die rol van die bruidegom wat sy bruid moet agternasit. Gelukkig is sy liefdeslewe weg van die kameras sonder dié soort drama. Edwin en Ansu Visser, die vrou in sy lewe, het mekaar ontmoet toe Wonderlus verlede jaar verfilm is. Ansu vertolk die rol van ’n naïewe romantikus.
Die verloofde paartjie Donnalee Roberts en Ivan Botha het ook na die rolprent gaan kyk. Donnalee het klassiek gelyk in ’n rokkie “wat sommer in my kas was” en skoene van Zara.
Ander bekendes by die première was Bobby van Jaarsveld (Lea se mede-akteur in die kykNET-komedie Mense Mense), Stiaan Smith (wat Ruan “die moedelose een” speel), Binnelanders se Ramey Short en Getroud met Rugby se Christel van den Bergh, Werner Coetser, Altus Theart en Zetske van Pletzen.