Mense en Hul Dinge
’NNEEF van wyle Robert Kardashian het onlangs onthul dié voormalige patriarg van die werklikheidstelevisiefamilie sou “in sy graf omgedraai het” as hy moes weet hoe saai en materialisties Kim (37), Khloé (33), Kourtney (39) en Rob (31) nou is.
John Kardashian (68), wat ’n onderneming genaamd Kardashian Construction saam met sy seun bedryf, sê hulle is erg verleë oor hul beroemde familie en wil hoegenaamd niks met hulle te doen hê nie. John beskryf Kris Jenner (62) as “’n flerrie wie se geld- en roembehepte dogters nie veel beter as sy is nie.
“Dis absoluut walglik dat sy geld uit Kim se pornofliek maak en hulle almal al soveel plastiese chirurgie gehad het. Dit sou nie gebeur het as Robert nog hier was nie,” sê hy.
John se seun, Johnny (34), is ook geïrriteerd met die manier waarop hul familienaam gebruik word en sê die naam pas meer in sy vakgebied. “Ek haat dit. Dis ’n baie sterk van en ek kan nie daarvan ontsnap nie,” sê Johnny.
“Ons kan nie die naam van die onderneming verander nie, want ons besit dit al jare. Die naam beteken ‘klipkapper’ in Armeens en dis wat ons steeds doen. My kant van die familie stam van werkersklas- en hardwerkende mans af. Dis ons wat die ware talent het.”
Maar nie al die Kardashians verpes hul beroemde familielede nie. Die werklikheidstelevisiefamilie het na-aper-familielede wat in die Kaliforniese woestyn woon. Varus Kardashian (74), nog ’n neef van Robert, het ook besluit om sy drie dogters se name met ’n K te laat begin en het hulle Kourtni, Kara en Krista gedoop.
Die drie meisies lyk selfs soos hul beroemde niggies, het al in hul program op E! verskyn en op hul Instagram-blaaie gepryk.
Hul ma, Janet (71), is ’n afgetrede onderwyseres en sê hulle bly in verbinding met hul niggies. Hulle het al Kim se derde kind, Chicago, en haar halfsuster Kylie Jenner se dogter, Stormi, ontmoet.