Vrou getuig uit graf ná branddood
Judy is oorlede twee jaar nadat haar eksverloofde haar aan die brand gesteek het, maar getuig teen hom in ’n geskiedkundige saak
WANNEER Michael Slager binnekort weens die moord op sy eksverloofde teregstaan, sal ’n stem uit die graf hom beskuldig. Sy slagoffer sal aan die hof beskryf hoe hy by ’n vulstasie in Gahanna, Ohio, petrol oor haar gegiet en haar toe met sy sigaret aan die brand gesteek het. In haar eie stem sal sy vertel hoe sy na Bo om hulp geskree het terwyl die vlamme haar verswelg het.
In ’n geskiedkundige oomblik in die Amerikaanse regspleging sal Judy Malinowski teen Slager getuig deur ’n video wat opgeneem is voor sy in Junie 2017 beswyk het aan die brandwonde wat sy in Augustus 2015 opgedoen het. En Slager, wat reeds tronkstraf uitdien weens die afskuwelike aanval, sal binnekort opnuut teregstaan; dié keer weens moord.
Haar regspan het haar getuienis op video vasgelê toe hulle besef sy verloor haar twee jaar lange oorlewingstryd.
Maar dis nie al bydrae tot die regspleging wat uit haar lyding gespruit het nie. Danksy ’n wysiging aan die deelstaat Ohio se strafreg waarvoor sy gepleit het, is die maksimum vonnis vir die misdaad van verminking, waaraan Slager reeds skuldig bevind is, met ses jaar verleng.
Dit staan as Judy Se Wet bekend.
‘ EK HET nooit geweet ’n mens kan so boos wees nie,” het Judy (33) kort voor haar dood aan die Britse poniekoerant The Sun gesê. “Hy’t net daar gestaan en niks gedoen nie.” Sy het gesê sy en Slager (42) het stry gekry. Toe sy wegstap, het hy haar van agter bekruip, petrol oor haar gegooi en haar aan die brand gesteek.
Tydens sy eerste verhoor het Slager aangevoer hy het Judy per ongeluk aan die brand gesteek deur sy sigaret in haar rigting te gooi. Volgens een getuie het Slager die vlamme aan Judy se lyf met ’n brandblusser probeer blus. In Desember 2016 is hy 11 jaar tronkstraf opgelê.
Maar Judy se lyding het voortgeduur. Sy was twee jaar lank in ’ n hoësorgeenheid en het 59 operasies ondergaan. Sy het twee vingers, albei ore en al haar blonde hare verloor. Sy het oop wonde aan haar rug en sitvlak gehad, was verlam, en haar stem was net ’n fluistering.
Judy se saak het soveel aandag gekry, Ohio-politici het hulle vir ’n langer maksimum vonnis vir die misdaad verminking begin beywer. Judy het die Ohiosenaat uit haar hospitaalbed deur Skype toegespreek: “My, my kinders en almal om ons se lewe is verwoes. Die bestaande wetgewing is onregverdig.”
Sy het op 27 Junie 2017 gesterf, net voor die senaat Judy Se Wet aanvaar het.
Maar dokters het voor haar dood al ’n ruk lank gewaarsku haar toestand gaan vinnig agteruit. Dit het haar regspan laat besluit om op ’n moordverhoor voor te berei terwyl sy aan die lewe vasklou. Toe sy haar laaste asem uitblaas, was haar getuienis reeds op video verfilm.
Slager se moordverhoor sal na verwagting in Julie begin. In ’n voorverhoor in Januarie het sy advokaat gesê die video is ontoelaatbaar, want dis ingevolge burgerlike reg bekom, nie strafreg nie.
Maar regter Guy Reece het van hom verskil. “Sy was kritiek en al een wat oor die voorval kon getuig,” het hy beslis.
Judy se dogter Kaylyn (14) het die geskiedkundige besluit verwelkom. “Slager is net 11 jaar tronkstraf opgelê; ek, my ma en my suster het lewenslank gekry.”
Slager het vergeefs probeer om die verhoor na elders te verskuif omdat hy meen hy sal weens openbare belangstelling nie in Ohio regverdig verhoor word nie. Hy kan lewenslange tronkstraf kry.
Dit was Judy se laaste wens dat haar eie getuienis in die hof aangehoor word, het haar ma, Bonnie Bowes, vertel. “Daardie kind het twee jaar om haar lewe geveg sodat sy self haar storie kon vertel.”
En nou sál sy – uit die graf.