Op ons speellys – agt nuwe enkelsnitte en albums

Dié lys sal ’n mens se hart vinniger laat klop en jou voete laat roer, of jy nou wil skoffel of na musiek met meer diepte en betekenis wil luister

HOLA IL DIVO

Hola is die eerste enkelsnit van die tenoorgroep se sewende album, Timeless, wat volgende maand uitgereik word. Dit is ’n Spaanse weergawe van die Britse sangdiva Adele se treffer Hello. Soos altyd beïndruk hulle met hul harmonisering en verwerking van ’n tydlose treffer.

VISVANG TUNES GAAN GROOT VERSKEIE KUNSTENAARS

Dié album het net die regte musiek om langs die viswaters te geniet. Onder die snitte tel Hou My Vas (Rooies), Voort Voort Meneer (Jakkie Louw), Gat’ Ons Môre See Toe (Gerhard Steyn), Loopdop (Kaptein Skuim) en Beste Bra (Jan Rhaap).

VASVAT SNARE ANDRÉ VAN DEVENTER & GERHARD MEYER

Dié duo se vierde album bevat die unieke kombinasie van ’n driesnaarpiek en ’n ritmiese kitaar. Die genres wissel ritmies van ’n seties, wals en vastrap tot ’n polka. Van die bekende wysies is So Lank As die Rietjie en Ou Kalahari. Balke toe met dié een!

BAKENLIG LEON GROPP

Bakenlig is dié bekroonde kitaarspeler se eerste enkelsnit sedert die uitreiking van sy debuutalbum, Rooidag (met gedigte van NP van Wyk Louw). Dit is ’n ritmiese folkliedjie oor die terugkeer na wat jou in die lewe anker. Dit is lekker om na te luister, maar tog ook poëties en kan daarom die hartsnare roer.

OORLOG CHANELL VAN DEN BERGH

Die nuwe enkelsnit van die aktrise en sangeres wat onder meer in die fliek Trouvoete te sien was, is ’n polsende c ou n tryp op liedjie oor’ n innerlike stryd. Dié snit sal deel uitmaak van haar debuutalbum. Met die nodige skaafwerk aan haar musiek kan sy dalk nog ’n bekende naam word.

DRAKENSBERGE LIEFDE JAK DE PRIESTER

Dié liedjie is die derde enkelsnit van Jak se album 15 Jaar. In sy tipiese storie vertel sang styl sing hy oor die opwinding van die dag dat ’n mens uit die stad vlug om in die Drakensberge te gaan ontspan. Die snit bied heerlike De Priester-genot.

BEYOND INFINITY DAWIE DE JAGER

Hoekom die kreatiewe komponis van talle plaaslike fliektreffers nie groter erkenning as sanger kry nie, weet nugter. Met dié kontemporêre enkelsnit bewys hy hoe talentvol hy is. Dawie was ’n deelnemer aan The Voice SA en ’n lid van die groepe Klopjag en Die Tuindwergies.

HOFNAR FRIKKIE VAN BILJON

Die sanger wat verlede jaar die bedryf betree het, beïndruk met sy vierde enkelsnit. Dit is ’n ligte popliedjie met geestelike ondertone. Frikkie ,’ n voltydse rekenaarprogrammeerder wat ook by sang bediening by die Gereformeerde kerk Centurion betrokke is, kan nog naam maak in die Afrikaanse musiekmark.