AS JOU WIELE OPHOU DRAAI
Wat as jou ryding lol en die handelaar bly steeks?
OF JY nou met ’n vragmotor of ’n motorfiets ry – as die wiele lol en jy en die handelaar bots oor die herstelwerk, is daar hoop.
As jy voel jy het alles moontlik gedoen, kan jy ’n klag by die ombudsman vir die motorbedryf indien. Dié instelling is in 2014 gestig om geskille tussen verbruikers en diensverskaffers te besleg. Dit omvat nuwe en tweedehandse voertuie en behels kwessies wat op motorhandelaars van toepassing is, soos die ou wat ’n motor met 107 000 km op die odometer gekoop het, maar later by ’n ander handelaar hoor dit het reeds drie jaar vantevore 135 000 km op die klok gehad. Of die man wie se bromponie ná slegs 500 km nie meer wou ry nie.
Albei dié verbruikers se klagtes is in hul guns besleg. Maar onthou, die ombudsman is onafhanklik en kan ook in die diensverskaffer se guns beskik.