Ou staatmakers kry byderwetse kinkels
Vir Erfenisdag op 24 Septembert doen ons ’n ietsie anders met huiskosgunstelinge
DEKADENTE STYWEPAP EN WORS
Ons maak goeie ou stywepap spesiaal met beleë cheddar, pietersielie en suurlemoenskil. GENOEG VIR 4 MENSE BEREIDING: 20 MIN. GAARMAAK: 30 MIN. BOEREWORS
300 g boerewors PAP 375 ml (1½ k) mieliepap 60 ml (¼ k) botter 100 g beleë cheddar, gerasper 1 suurlemoen se gerasperde skil ’n hand vol vars pietersielie, gekap
TAMATIES 15 ml (1 e) olyfolie 250 g kersietamaties 2 knoffelhuisies, gekap 15 ml (1 e) botter 1,25 ml (¼ t) suiker sout en vars gemaalde peper VIR AFRONDING ekstra pietersielie, gekap ekstra suurlemoenskil suurlemoenwiggies
Hou 4 kebabstokkies (in water geweek) byderhand. Maak ’n vuur met genoeg kole vir braai.
1 Boerewors Sny die wors in 4 gelyke stukke. Rol elke stuk op en ryg aan ’n kebabstokkie. Pak die kebabs op ’n toeknyprooster en braai oor die kole tot gaar. Hou eenkant.
2 Pap Plaas die mieliepap in ’n kastrol en voeg 500 ml (2 k) kookwater by. Roer goed en bring tot kookpunt. Roer af en toe om te verhoed dat die pap vasbrand. 3 Voeg nog 250 ml (1 k) kookwater by sodra die ander water weggekook is. Roer goed en voeg die botter by. Laat nog ongeveer 15 min. stadig prut of tot die pap gaar is. 4 Roer die kaas, suurlemoenskil en pietersielie deur en meng goed. Hou eenkant. 5 Tamaties Verhit die olie in ’n groot pan en braai die tamaties tot effens geskroei. Verlaag die hitte en voeg die knoffel en botter by. Roerbraai 1 min. Geur met die suiker, sout en vars gemaalde peper. 6 Vir afronding Verdeel die pap tussen 4 bakkies. Skep die tamatie bo-op gevolg deur die boereworskebabs. 7 Sprinkel nog pietersielie en suurlemoenskil oor en sit voor saam met die suurlemoenwiggies.