Blitsvervoer van die toekoms
Blitsvervoermiddels van die toekoms – met of sonder bestuurders – beloof om ons wêreld veel kleiner te maak
HOE lyk die toekoms van vervoer op aarde? Amper enigiets is moontlik – selfs reusevuurpyle wat jou binne ’n uur na die ander kant van die aardbol kan neem. Die kommersiële stralers van die 1950’s was die laaste groot uitvindsel wat vervoer betref, buiten hoëspoedtreine. Die eerste suksesvolle snelspoorlyn, die Shinkansen, het in 1964 in Japan tot stand gekom. Sedertdien is klein verbeterings aan alle soorte vervoer aangebring, pleks van splinternuwe idees.
Nuwe stralers is dalk ligter of meer brandstofdoeltreffend as hul voorgangers, maar verskil nie soveel van die heel eerste kommersiële stralers nie. Dieselfde kan van nuwe motors, skepe, treine en selfs fietse gesê word. Die moderner weergawes lyk beslis anders en funksioneer baie beter, maar dit werk in beginsel nog dieselfde as die eerste motors, skepe, treine en fietse.
Dit gaan alles binnekort verander.