Soekenjinreus Google vier sy 20ste
Die soekenjin wat didie wêreldêld op sy kkop gekeerk hhet, wordd vanjaar 20 en het in ’n enorme maatskappy ontwikkel
DIT is die jaar 1996 en die wêreldwye web is ’n verwarrende wildernis van inligting waarin die onervare reisiger maklik verdwaal. Maar in hul koshuiskamers by die Stanford- universiteit werk twee slimkoppe hard om die datachaos te tem. Hul geheime wapen? Iets genaamd “Backrub”.
Dis goed Larry Page en Sergey Brin het dié geesteskind van hulle herdoop voor hulle dit in September 1998 aan die wêreld bekendgestel het as Google.
Nou, 20 jaar nadat hulle besef het hulle kan geld maak uit ’ n soekenjin wat jou met die warboel data op die internet help, is Google op almal se vingerpunte.
Die naam is ’n woordspeling op die enorme getal “googol” (1 gevolg deur 100 nulle – in Afrikaans ’n “kokol”). Vir die twee baanbrekers het dit hul sending verwoord: om ontelbare webtuistes vol data te indekseer en “die wêreld se inligting te organiseer en universeel toeganklik en nuttig te maak”.
Vandag is Google, oftewel die beherende maatskappy, Alphabet, waarvan dit die kern vorm, onder die wêreld se vyf topmaatskappye. Alphabet het die laaste klompie jare soms vir Apple, Amazon en Microsoft as waardevolste maatskappy uitgestof.
Google.com is die mees besoekte webtuiste. Larry en Sergey het ook die visie gehad om die video-enjin YouTube, die webtuiste wat die naasmeeste besoek word, op te raap.
Met die 20ste herdenking op hande kyk ons hoe Google ander soekenjins verpletter, ’n nuwe woord geword en ons almal se lewe verander het. AAN DIE BEGIN Larry en Sergey het met hul aanvanklike ontmoeting op universiteit in Kalifornië in 1995 “oor omtrent alles verskil”, maar nietemin ’n vennootskap gesluit om ’n soekenjin te skep. Hulle het die PageRank-algoritme (’n verwysing na Larry se van) bedink, wat webtuistes volgens die gewildheid van hul trefwoorde gerangskik het.
Dié tegno-entrepreneurs het dinge toe al anders gedoen. Hulle het die kas vir hul eerste bediener, waarvoor hulle destyds 10 van die grootste beskikbare hardeskywe ( 4 GB elk) saam gevoeg het, met Lego-blokkies gebou.
Teen September 1998 het die twee $1 miljoen dollar (toe sowat R5,5 miljoen) onder familie, vriende en beleggers bymekaargeskraap en is Google Inc. gebore. Larry- hulle het toe van hul koshuiskamers geskuif na hul eerste kantoor, ’n motorhuis wat hulle by Susan Wojcicki, vandag YouTube se baas, gehuur het.
Google het nou vergane soekenjins soos AltaVista en Infoseek oorskadu. Maar in 1999 het die twee vennote hul jong maatskappy vir ’n skamele $750 000 (toe R4,6 miljoen) aan ’n ander soekenjin, Excite, probeer verkoop. Hulle het blykbaar gevoel hul internetprojek slurp te veel tyd op en hulle moet liewer verder studeer.
Gelukkig vir hulle was die Excite-baas, George Bell, glad nie opgewonde oor hul aanbod nie. Vandag word Google se waarde op meer as $ 760 miljard (R11,8 biljoen oftewel R11,8 duisend miljard) geraam. En George se besluit om destyds nie te koop nie word as een van die domste sakebesluite ooit beskou. HUL ANDER UITSKIETERS Die duo is deur ’n begeerte aangevuur om ’n rits innoverende uitskietermaatskappye te hê. In ’n stadium het hul werknemers ’n dag per week af gekry om skeppend oor nuwe projekte te dink.
Hulle het meer as 180 maatskappye by die Google- en meer onlangs die Alphabet-stal gevoeg, waaronder die sel-
foonreus Motorola en YouTube.
Die Google-arm van hul onderneming sluit in die soekenjin, die Google Mapsnavigeerprodukte, YouTube en hul Android- mobiele bedryfstelsel. Dis waar hul grootste inkomste vandaan kom. Hul riskanter ondernemings sluit in:
X: kunsmatige intelligensie; hommeltuigaflewerings; kontaklense wat glukosevlakke bepaal; bestuurderlose motors.
Calico: die strewe na lewensverlenging. Veral Sergey stel belang in ewige jeug.
Beleggings: Met Google Ventures en Google Capital finansier hulle projekte.
ALMAL SE DROOMWERK
Google is al telkens as die wêreld se prettigste werkplek aangewys. Larry en Sergey sê in ’n stigtersbrief: “Ons werknemers – Googlers – is alles. Ons bied hulle ongewone voordele, insluitend gratis etes, doktersbesoeke en wasmasjiene. Ons weet wat die langtermynvoordele hiervan vir die maatskappy is.”
By die Googleplex, hul hoofkantoor in Kalifornië, sluit die pretkultuur in: gratis haarsnye; gim-, swem-, videospeletjie- en tafeltennissessies op die perseel; droogskoonmakers; masseerkamers . . . en Google-fietse in die blou, geel, rooi en groen van die maatskappy, waarmee jy die “Google-kampus” kan platry.