Gwyneth haak af
Op die foto stap die bruid saam met haar glimlaggende bruidegom in die paadjie af terwyl gaste hulle met organiese konfetti (oftewel blomme en blare) bestrooi.
Sy dra ’n Valentino-rok met ’n oop rug en kapmoue, en haar golwende blonde lokke tuimel oor haar skouers. Hy lyk aantreklik in ’n ontwerperspak.
Dis die eerste amptelike foto van Gwyneth Paltrow (46) se troue met die skrywer, regisseur en vervaardiger Brad Falchuk (47).
En die eerste plek waar sy dié kiekie plaas, is natuurlik op Goop, haar leefstylwebtuiste.
“Dit het my ’n rukkie geneem om tot aksie oor te gaan, maar vir diegene wat dit versoek het, is hier eindelik ’n kykie na die beste dag van ons lewe,” skryf sy in ’n opvolgplasing op Instagram.
In presies dieselfde week waarin dié foto uitgereik is, het die aktrise onthul sy is midde-in haar perimenopouse. Haar boodskap is dus: Vat so, hormone, julle sal nie die pret uit my lewe haal nie.
“Ek kan die hormoonveranderings voel gebeur,” sê die ma van Apple (14) en Moses (12). “Die sweet. Die buie. Jy is net ewe skielik woedend sonder rede.”
Maar GP (soos almal by Goop haar noem) dink menopouse “het ’n baie slegte reputasie en het ’n nuwe baadjie nodig.
“Ek onthou toe my ma menopouse beleef het, was dit ’n groot storie, en ek dink daar was vir haar smart en baie emosie by betrokke.
“Ek dink nie ons het ’n goeie voorbeeld d van ambisieuse menopousale vroue in ons samelewing nie.”
Op 46 jaar het Gwyneth haar benadering tot fiksheid aangepas “om meer gewigte te gebruik om beendigtheid te bou, en ek hou aan om so gesond moontlik te eet – onverwerkte kosse, groen groentes, skoon bronne van proteïen – veral met middagete,” skryf sy op haar webtuiste.
Maar dit gaan nie net oor die dieet en oefening nie. As jy regtig so moeiteloos en verruklik soos GP die middeljare wil betree, sal jy moet opdok vir die goed wat sy drink: ’n splinternuwe reeks aanvullings genaamd Madame Ovary.
Dié aanvullings bevat ’n mengsel van noodsaaklike vitamiene, kruie, fitovoedingstowwe en “adaptogene” om neweeffekte van menopouse soos warm gloede, vaginale droogheid en stresverwante moegheid te bestry. Of so word beweer.
Maar selfsorg is nie gratis nie: Madame Ovary jaag jou sowat R1 300 per maand uit die sak. Tog, as die verlede enigsins ’n aanduiding is, sal Goopaanhangers dit opraap.
Want maak nie saak hoe kwaai die kritiek teen die produkte op die webtuiste is nie, mense kan net nie wegbly nie. BRONNE: THE NEW YORKER, THE DAILY MAIL, THE TELEGRAPH, PEOPLE