Judy Greer (links) en Jamie Lee Curtis laat jou skrik in die nuwe Halloween
Gruwel. Met Jamie Lee Curtis, Judy Greer en Andi Matichak. Regisseur: David Gordon Green. 18GrTG.
PIETER VAN ZYL Waaroor gaan dit?
“Wat agter daardie seun se oë lê is suiwer boosheid,” het die psigiater in die heel eerste Halloween-fliek in 1978 gesê. In die nuwe fliek is hy ’n middeljarige man en al 40 jaar lank opgesluit in ’n gestig vir reeksmoordenaars en ander skrikwekkende booswigte.
Maar Michael Myers hunker daarna om weer daardie grillerige wit masker op te sit en mense in repies te sny . . .
Sy suster, Laurie Strode (voortreflik gespeel deur Jamie Lee Curtis), het genoeg gehad daarvan om elke jaar met Halloween, 31 Oktober, in vrees vir haar broer te leef. “Ek bid hy ontsnap sodat ek hom kan doodmaak,” vertel Laurie aan ’n priester.
Dié keer wag sy hom met ’n arsenaal vuurwapens by haar huis in; en haar voorbereidings is nie om dowe neute nie.
Die owerheid verskuif Michael in ’n bussie na ’n nuwe plek van aanhouding, maar onderweg gebeur ’n ongeluk en hy ontsnap.
Dan hervat hy natuurlik sy moordtog op Haddonfield, Illinois.
Laurie gaan haar kans kry om hom te probeer doodmaak. Maar gaan sy dit regkry? En hoeveel ander mense sal eers moet sterf?
Is dit goed?
’n Mens skrik dat jy hik. Dis soos die gruwelflieks uit ons kinderjare. Daardie flieks wat ons skelm by maatjies op ’n videomasjien gekyk het: Friday the 13th (1980), Poltergeist (1982), A Nightmare on Elm Street (1984), The Fly (1986) en Child’s Play (1988). Dis flieks wat jou laat naels kou en nagmerries gee.
Deur die jare het talle “opvolgflieks” verskyn, waarvan ’n hele paar onkykbaar swak was.
Dié nuwe fliek neem ons terug na die vreesaanjaende stemming van die oorspronklike fliek. Wanneer John Carpenter se temaliedjie (dis die luitoon op sy selfoon) begin speel, gaan rillings teen jou ruggraat af.
Wie gaan nou vermoor word? Dis soos die trefferreeks Game of Thrones: Wees voorbereid daarop dat jou gunstelingkarakter op ’n wrede manier geslag gaan word.
Die galgehumor tussen die skriktonele (die regisseur was ook vir die skreeusnaakse Pineapple Express van 2008 verantwoordelik) help darem die spanning verlig.
Word ’n 12de fliek beplan? Besluit maar self nadat jy die slottoneel gekyk het.