Mense en Hul Dinge
KIM KARDASHIAN het onlangs groot onenigheid in haar familie veroorsaak toe sy gesê het haar suster Kourtney is die “mins interessante om na te kyk”. Maar die drama was oënskynlik vergete toe die twee onlangs ’n sondeurdrenkte familievakansie op die Indonesiese eiland Bali geniet het om tonele vir die nuwe seisoen van Keeping Up with the Kardashians te verfilm. Geen kwade gevoelens was te bespeur tussen Kourtney en haar eks, Scott Disick, nie. Die twee het heerlik saam met hul kinders, Mason (8), Penelope (6) en Reign (3), en Kim se dogter North (5) in die see baljaar.
’n Bron sê die familie het vyf dae lank in die spoggerige Soori-hotel op die eiland tuisgegaan “op ’n landgoed aan die see, reg op die strand” wat hulle sowat R435 000 uit die sak gejaag het. Volgens die hotel se webtuiste het die landgoed ’n privaat gim, spa en talle ander geriewe.
Maar die werklikheidstelevisiegesin het blykbaar veel meer in die son en see belanggestel as om die oord se weelderige geriewe te gebruik. Kim (38), Kourtney (39) en Scott (35) het selfs beurte gemaak om van die kant van hul luukse boot in die see te spring terwyl die kinders toekyk.