Liewe Elize
VEk is bejaard, en my dogter knou my af deur altyd by groot geleenthede, byvoorbeeld haar troue, die geboorte van haar tweeling en haar man se hartaanval, te maak asof ek niks reg doen nie. Wanneer ek probeer help, verskree sy my asof ek haar slaaf is. Hoe hanteer ek dit? My hart is gebreek. Haar persoonlikheid het deur die jare heeltemal verander. BDH, SMS
AJy hoef haar nie die res van jou lewe ’n stok te gee om jou mee te slaan nie. Jy kan weier om haar slagoffer te wees. As ’n mens se volwasse kinders jou boelie, kan daar ’n paar moontlike oorsake daarvoor wees. Vreemd genoeg is een van dié oorsake onsekerheid oor hoe om in sekere situasies op te tree. Hierdie gevoel kan haar aggressief en vyandig maak. Die onsekerheid kan uit haar kinderjare spruit toe sy moontlik toegelaat is om oneerbiedig teenoor ’n gesagsfiguur te wees. Angstige volwassenes is dikwels geneig om hul ouers te probeer manipuleer in ’n poging om beheer oor hul angs en lewe te kry.
Wat ook al die rede, selfregverdigings van haar kant en verskonings van jou kant sal nie jul verhouding herstel nie.
Enige boelie floreer op mense wat onseker van hulself is. Hoe meer selfgeldend jy dus in sulke situasie optree, hoe meer neem jy die wind uit haar seile. Moet haar nooit op jou beurt afknou nie. Jy moet wel perke stel deur duidelik te sê jy sal nie langer sulke gedrag duld nie. Wys haar daarop as sy verkeerd is. Boelies hou daarvan om heeltyd reg te wees. Hulle skrik ook as jy ’n ondersteuningspan het. Dit kan help as jou familie of vriende haar op haar plek sit wanneer sy jou voor hulle verneder. Vertel hulle van haar gedrag, gee voorbeelde en vra hulle om vir jou op te kom.
Dit sal ook help as jy jou emosioneel goed versorg sodat jy sterk genoeg is om weerstand teen haar te bied. Doen dinge wat jy geniet soos om saam met vriende te kuier of in die natuur te stap.