Topvideospeletjies vir die Kerskous
Dié top videospeletjies is net wat jy op jou Kersfees wens lys moet hê
Red R Dead Redemption 2 *****
PS4, P Xbox One Spelers noem Rockstar se jon jongste uitreiking in die Red Deadfranchise reeds die speletjie van die jaar en die beste oopwêreldspeletjie wat al gemaak is. En nadat ek meer as 100 uur van die speletjie gespeel en die storie voltooi het, kan ek ook my mening lug.
RDR2 se wêreld het geen gelyke wat diepte betref nie. Die grafika is asemrowend en die uitgestrekte kaart ’n vreugde om te deurkruis.
Om elke draai is iets nuuts om te ontdek en te sien. Die karakters voel of hulle behoort, niks is uit plek nie en van die beste interaksies in die speletjie kom in die vorm van sysendings, klein oomblikke met ander karakters en lukrake gebeure wat buite in die wêreld plaasvind.
Red Dead Redemption 2 is eintlik ’n voorloper tot Red Dead Redemption. Dit volg die storie van Arthur Morgan, ’n voëlvryverklaarde en lid van ’n berugte bende onder leiding van Dutch van der Linde, die hoofantagonis van die eerste speletjie.
Die storie is ongelukkig een van die gebiede waar RDR2 nie heeltemal die hoogtes bereik wat deur ander dele van die speletjie gestel word nie. Dis ’n meestal liniêre en voorspelbare affêre wat wel ’n paar uitstaanoomblikke het, maar niks wat te onvergeetlik of vindingryk is nie.
Die kern-speelervaring is meestal wat ons van Rockstar-speletjies verwag en die skietspel voel baie soortgelyk aan hul vorige uitreiking, Grand Theft Auto 5. Dit is stadig, lomp en steun swaar op ’n outo-mikstelsel.
Beweging is ook stadig, en dit kan voel of jou knoppie-insette eerder ’n voorstel is oor waar Arthur moet gaan as ’n direkte kontrolemeganisme.
Maar daar’s ’n rede waarom die speletjie so voel. Danksy die sorgsame animasie is dit soos om na ’n goed vervaardigde rolprent te kyk. Arthur beweeg soos ’n regte mens wat in die wêreld geanker is, en so ook al die ander karakters. Die aandag aan detail in dié aspek oortref enigiets wat al voorheen gesien is.
Karakters het unieke maniertjies en kenmerkende maniere van stap. Elke enkele voorwerp en mens in die speletjie lyk uniek en die kunsregie is op ’n standaard wat nog nie voorheen in ’n speletjie gesien is nie.
Alles in RDR2 neem tyd. Jy sal in werklike tyd hout kap, in werklike tyd sakke graan in die kamp heen en weer dra en in werklike tyd slukke koffie uit jou beker drink.
Red Dead 2 is egter die beste wanneer dit teen dié stadiger pas gespeel word. Dis ’n cowboy wat op ’n perd se rug oor ’n vlakte voortslenter, nie ’n hoëspoedwedren van geweervuur na die einde toe nie. My tyd wat ek in die wêreld van Red Dead Redemption 2 deurgebring het, is nie iets wat ek gou sal vergeet nie. Die speletjie doen baie om die speler in te trek en sy belangstelling te behou in absoluut alles wat in die wêreld aangaan.
Ek kan nie sê ek het pret gehad in Red Dead 2 nie, maar wat ek wel kan sê, is dat ek ’n ervaring gehad het wat anders is as enigiets wat enige ander speletjie kon oplewer.
Dit is vir my onmoontlik om nie die speletjie as ’n moetkoop aan te beveel nie.
WWE 2K19 ***
PS4, Xbox One
WWE 2K19 voeg baie verbeterings by die kern van verlede jaar se speletjie, maar voel op die ou end grotendeels dieselfde. Van die openingstoneel is dit duidelik vanjaar se herhaling maak staat op aanhangers se nostalgie vir die gloriedae van die WWE.
Die speelervaring is presies wat liefhebbers in die laaste tyd van WWE-speletjies verwag. Die pas van die stoei is stadig en metodies, maar wanneer sake wel intens raak, kan dit baie moeilik wees om die aksie te volg. Nuwe toevoegings soos die terugbetaalstelsel gee die speler ’n tweede, spesiale vermoë om die verloop van ’n wedstryd te verander, soos ’n kitswengreep of vinnige herstel wat wedstryde vars hou. Die Towersmodus laat spelers hul geskepte stoeiers gebruik om ’n verskei- denheid uitdagings in ’n enkele wedstryd of deur ’n leerstelsel aan te pak en tot bo te vorder.
Die 2K Showcase-modus maak ’n terugkeer met ’n aksiebelaaie lopie deur Daniel Bryan se eksklusiewe arenas en wedstryde wat sonder twyfel die vermaaklikste kenmerk van die nuwe speletjie is. Dit gee ook ’n kykie agter die skerms na Daniel Bryan se stoeiloopbaan.
In die geheel is WWE 2K19 ’n baie vermaaklike speletjie as jy tyd wil verwyl deur informeel met effense mededingendheid te speel.
– Azeemud-Deen Jacobs