Nuwe vervolgingsbaas ’n ystervrou
Die nuwe baas van die vervolgingsgesag is ’n tawwe tienie wie se deugde oraloor besing word, maar ’n moeilike taak wag op haar
IN REGSKRINGE word sy glo soms die Tigress genoem – maar waarskynlik nie wanneer sy dit kan hoor nie. Want jy wil nie aan die verkeerde kant van dié fyn, elegante vrou met die vlymskerp brein beland nie. Wie kan vergeet hoe sy, as aanklaer by die Kingkommissie van ondersoek na wedstrydknoeiery in 2000, die voormalige Proteakaptein Hansie Cronjé letterlik in trane gehad het toe hy voor die kommissie moes getuig?
En daar is g’n twyfel oor wat die Tigress se eerste groot taak in haar nuwe pos sal wees nie: Neem die berugte Guptabroers se spoor en vervolg enigiemand wat na bewering die wet oortree het. Sny die kanker van korrupsie uit. Wys SuidAfrikaners dat geregtigheid tog seëvier.
Regskenners en politieke kommentators juig nadat Shamila Batohi onlangs as die heel eerste vrouebaas van die nasionale vervolgingsgesag (NVG) aangestel is. Hulle meen dis ’n sterk aanduiding dat pres. Cyril Ramaphosa daaraan toegewy is om die verrotting van die Zuma-jare om te keer.
Die 57-jarige Shamila, wat tot onlangs as senior regsadviseur by die internasionale strafhof in Den Haag, Nederland, gewerk het, is uitgeknip vir die pos, word wyd geglo.
Oudpres. Nelson Mandela het haar in die 1990’s verkies tot lid van die hoëvlakspan wat apartheidmoordbendes ondersoek het, en nou toon Ramaphosa dieselfde vertroue in haar.
SHAMILA sal eers in Februarie 2019 amptelik haar nuwe pos beklee. Op haar LinkedInprofiel staan steeds sy werk as ’n senior regsadviseur by die internasionale strafhof. Sy het dié pos in Den Haag in 2009 losgeslaan ná die dood van haar man, dr. Raj Somaru, ’n tandarts. Destyds het sy vertel sy is opgewonde oor die skuif, maar ook hartseer omdat sy haar twee seuns, Nikhil (29) en Shaunik (28), in Suid-Afrika moes agterlaat. Hulle was destyds nog studente.
“My familie woon in Durban. My lewe is in Durban. Ek is lief daarvoor,” het sy toe gesê.
Volgens haar kennisse is sy ’n taai vrou met onafhanklike denke wat nie sal toelaat dat enigiemand haar boelie nie – veral nie die politici nie.
Haar oom Vicky Batohi vertel sy het as ’n jong meisie reeds ’n sterk veggees gehad.
“Ons het by die gesin se huis tafel-
‘Sy beskik oor integriteit, is ’n bekwame vervolger, ’n goeie administrateur, en ek dink sy kan die werk doen’